မုန်တိုင်းရဲ့ ကျောရိုး

ကျမ အသက် ၂၂နှစ် (၁၉၈၇)မှာ ရေးခဲ့တဲ့ ၀တ္ထုပါ။ စိစစ်ရေးကြောင့်ဆိုပြီး ပေဖူးလွှာမဂ္ဂဇင်းတိုက်မှာ ၂နှစ် အောင်းနေခဲ့တဲ့ ၀တ္ထုပေါ့။ ဦးဝင်းငြိမ်းက သူ့ရဲ့ ရွှေအမြုတေ မဂ္ဂဇင်း ပထမဆုံးအုပ်မှာ ရအောင် ထည့်မယ် ဆိုပြီး တင်လိုက်တာမှာ တကယ် သုံးလို့ရခဲ့ပါတယ်။ အဲဒီ ၀တ္ထုပါပြီး နောက်ပိုင်းမှာ ‘ခဗျားက Feminist လား” လို့ မကြာခဏ အမေးခံရတာလည်း သတိရမိလို့ ဒီဝတ္ထုလေး တင်ပေးလိုက်ပါတယ်။ မဂ္ဂဇင်းဝတ္ထုရှည်စ-ဆုံးမို့ ရှည်လျားတာ ကိုတော့ သည်းခံပါ။ ဒီဝတ္ထုလေးကို ကျမဘလော့စလုပ်ကတည်းက တင်ပေးဖို့ တောင်းဆိုတဲ့သူ တွေရှိပါတယ်။ ခုမှပဲ အချိန်အခါအရ တိုက်ဆိုင်လို့ တင်ပေးလိုက်တာပါ။

မုန်တိုင်းရဲ့ ကျောရိုး

(ဒီက ယူတာပါ)

ယောက်ျားအများစုဟာ သိပ်ရယ်စရာကောင်းတယ်လို့ ကျမပြောရင် ရှင်က မျက်လုံးပြူးတွေနဲ့ ကျမကို မကျေမနပ် ကြည့်ဦးမှာပါပဲ။ ပြီးခဲ့တဲ့ တစ်နှစ်ကျော်လောက်က ဆိုရင်တော့ ကျမကို မကျေမနပ်နဲ့ ရှင့်ရဲ့ ကြီးကျယ်ခမ်းနားတဲ့ စကားလုံးပြင်းတွေနဲ့ ကျမကို ပစ်ပေါက်မှာပေါ့။ ခုတော့ မကျေမနပ်နဲ့ ကြည့်ပြီး ရှင် အခန်းထဲက လှည့်ထွက်မယ်။ တံခါးကို အပြင်းထန်ဆုံး တွန်းပိတ်မယ်။ နောက်ဆုံး ကားကို အရှိန်အမြင့်ဆုံးနဲ့ မောင်းပြီး ကျမနဲ့ဝေးရာ အရက်ဆိုင်တစ်ခုခု ဒါမှမဟုတ် မိန်းမငယ်တစ်ယောက်ယောက်ဆီ ရှင်သွားမယ်.. ဒါပဲမဟုတ်လား.. ကိုအောင်ရဲ။ နှစ်နှစ်ကျော်ပေါင်းခဲ့တဲ့ ယောက်ျား တစ်ယောက်အကြောင်း သူ့မိန်းမသိတာ မဆန်းပါဘူးနော်။ ဒါပေမဲ့ ရှင် စိတ်မဆိုးပါနဲ့ ကိုအောင်ရဲ။ ရှင်တို့ယောက်ျားအများစုဟာ တကယ့်ကို ရယ်စရာကောင်း တာပါ။

ကြည့်လေ၊ ရှင်ဆို ကိုယ်တိုင်က ထက်မြက်မာကျောတဲ့ မိန်းမကို သဘောကျတယ်ဆိုပြီး ကျမကို ပိုင်ဆိုင်ဖို့ ကြိုးစားခဲ့တယ်။ ဟော… ဒီကနေ့ကျတော့ “မင်းဟာ မာနကြီးလွန်း၊ မာကျောလွန်းတယ် ထရီဇာ၊ ကိုယ်ဟာ ယောက်ျား၊ အိမ်ထောင်ဦးစီး၊ ပြီးတော့ မင်းရဲ့ရှေ့က ရပ်တည်ဖို့ အရည်အချင်း အပြည့် ရှိတယ်။ နေရာတကာ ကိုယ့်ကိုလွှမ်းမိုးတာ ကိုယ်မခံယူနိုင်ဘူး ထရီဇာ”လို့ ပြောလာပြန်တယ်။ ကျမကို ရှင် အဲဒီိလို ပြောတိုင်း ကျမ စဉ်းစားတယ်။ ကိုယ့်ကိုယ်ကို ပြန်ကြည့်တယ်။ ကျမကတော့ နဂို ‘ထရီဇာဘဦး’ ကနေ ‘ထရီဇာအောင်ရဲ’ ဖြစ်လာတာသာ ရှိမယ်။ ကျမရဲ့ စရိုက်၊ ဗီဇ၊ အမူအယာ၊ အပြင်အဆင်တွေကတော့ ဘယ်လိုမှ မပြောင်းလဲခဲ့ဘူး ထင်တာပဲ။ ထင်တယ်ဆိုတာထက် ယုံကြည်တယ်။ ထရီဇာဆိုတဲ့ မိန်းမက နဂိုကတည်းက ထုံထိုင်းတဲ့ မိန်းမမှ မဟုတ်ဘဲ ကိုအောင်ရဲ။ ရှင်နဲ့ရင်ပေါင်တန်းပြီး နိုင်ငံတကာရေးရာတွေ၊ နိုင်ငံတကာစာပေယဉ်ကျေးမှု တွေ၊ ဆွေးနွေးနေခဲ့တဲ့ မိန်းမလေ။ ရှင် အင်မတန် မက်မော မြတ်နိုးတယ်ဆိုတဲ့ အရည်အချင်းတွေရှိပါတယ်ဆိုတဲ့ ရှင့်ရဲ့မိန်းမပဲ။ ပိုပြီး တိတိကျကျ ပြောရရင် ရည်းစားတွေ အများကြီးထဲက ရှင် ဆန်ကာတင်ရွေးခဲ့တဲ့ မိန်းမပဲ။ ခုတော့ ရှင်မြတ်နိုးပါတယ်လို့ ပြောခဲ့တဲ့ ထက်မြက်မာကျောမှုကိုပဲ ရှင်က မကြိုက်ပြန်ဘူးတဲ့။ ရှင်ကသာ စိတ်မူမမှန်ခဲ့တာပဲ။ ဖေါက်ပြန်ခဲ့တာပဲ ကိုအောင်ရဲရယ်။ ကဲ.. ရှင် ရယ်စရာကောင်းမနေဘူးလား… ကိုအောင်ရဲ ။ ကျမကတော့ ကိုယ်က မှန်ပါလျက်နဲ့မှ ယောက်ျားက အပြစ်မြင်ရက်တယ်ဆိုပြီး ထိခိုက် ကြေကွဲနေမယ့် မိန်းမမျိုးမဟုတ်လေတော့ ရယ်ချင်တာပဲ သိတာပေါ့ ကိုအောင်ရဲရယ် နော … ။

+++++

ကျမဟာ စကားတစ်ခွန်းကို ဘယ်တော့မှ လက်လွတ်စပယ် မပြောတတ်ဘူးလေ ကိုအောင်ရဲ။ ပြီးတော့ ကျမစကားကို သူများလက်ခံအောင် အမြဲတမ်းအချက်အလက်ပိုင်မှ ပြောတတ်တယ်မဟုတ်လား။ (ကျမ သတိရသေးတယ်၊ အဲဒီလို ကျမ စကားပြော ကျွမ်းကျင်တာကိုလည်း ရှင်သဘောကျတယ်လို့ ဆိုခဲ့တာကိုး)။ ကျမရင်ထဲမှာလေ ရှင့်ကိုပြောချင်တဲ့စကားတွေ အများကြီးပဲ ကိုအောင်ရဲရယ်။ ခုလို စကားမှ ဟဟ မပြောကြ တော့တဲ့ အခြေအနေ ကြာလာလေ ပိုပြောချင်လာလေပဲ။ မပြောရတော့လည်း အဲဒီနာကျင် စကားလုံးတွေက ကျမရင်ထဲမှာ ပေါက်ကွဲနေပြန်ရော။

ကိုဝေလင်းကို ရှင်မှတ်မိတယ်မဟုတ်လား ကိုအောင်ရဲ။ ရှင်နဲ့ကျမ အိမ်ထောင်သက် တစ်နှစ်ကျော် ကာလ၊ တိတိကျကျပြောရရင် ရှင်နဲ့ ကျမရဲ့ ပဋိပက္ခဘ၀ စနေပြီဖြစ်တဲ့ အချိန်မှာ (ရှင့်ကိုရွဲ့ပြီး) ကျမ ပထမဦးဆုံး တွဲခဲ့တဲ့ အမျိုးသားလေ။ ရှင် ကျမကို ကမ်းလှမ်းမလာခင်ကတည်းက သူက ကျမကို ပရိုပို့စ်လုပ်ဖူးခဲ့တာ။ နောက်ကျမှ ပြန်တွေ့၊ တွဲဖြစ်ခဲ့ကြတာ။ ကျမက သိပ်လှတယ်လို့ ကျော်ကြားတယ်မဟုတ်လား။ သူက အလှကိုးကွယ်သူလေ။ ဆိုပါတော့… သူက ကျမကိုချစ်နေတုန်းပါပဲလို့ ပြောလာတော့ ကျမကလည်း ရှင်နဲ့အဆင်မပြေလို့ စိတ်ရှုပ်နေတဲ့အချိန်။ ကိုဝေလင်းနဲ့ ကျမ မွေးနေ့ပွဲတွေ၊ ဧည့်ခံပွဲတွေ၊ ရုပ်ရှင်တွေ၊ ပစ်ကနစ်တွေမှာ တွဲဖြစ်ခဲ့တယ်။ တွဲလာခဲ့ပြီး သုံးလ မပြည့်တပြည့်မှာ ရှင့်ကိုကွာရှင်းပြီး သူ့ကိုလက်ထပ်ဖို့ တောင်းဆိုလာတယ်။ ကျမ စဉ်းစားမယ်လို့ ပြန်ပြောဖြစ်ခဲ့တယ်။ အဲဒီနောက်ပိုင်း သူ ကျမအပေါ် နည်းနည်း ပိုင်စိုးပိုင်နင်း ဆန်လာတယ်။ (ရှင်တို့ယောက်ျားအများစုရဲ့ ထုံးစံအတိုင်းပေါ့ ကိုအောင်ရဲ)။ ကျမဟာ ထူးပြီး ယိုယွင်း လျော့ရဲစရာမရှိတော့တဲ့ မိန်းမပဲလို့ သူယူဆပြီး ကျမခန္ဓာကို ထိပါးဖို့ ကြိုးစားလာတယ်။ ဒီတုန်းက ကျမ တော်တော် ရှက်သွားတယ်။ ပြီးတော့ ရှင့်ကို သတိရနေခဲ့တယ်။ ကျမ အပြင်းအထန် ငြင်းပစ်လိုက်တယ်။ သူလည်း ရှက်သွားပုံရတယ်။

နောက်ပိုင်းကျတော့ ကျမ အလှပြင်တာကို သူမကြိုက်ဘူး။ ယောက်ျားတွေနဲ့ စကားမပြောစေချင်ဘူး ဆိုတာတွေ ဖြစ်လာတဲ့အချိန်မှာတော့ ကျမ ရယ်ချင်စ ပြုလာခဲ့တယ်။ နောက်ဆုံး “ထရီဇာ့ကို ဘယ်သူ ကြည့်တာမှ မကြိုက်ဘူးကွယ်” လို့ တတွတ်တွတ် (နားငြီးလောက်အောင်)ပြောလာတဲ့အခါလည်းကျရော… ကျမ သိပ်ရယ်ချင်သွားရော။ ကြည့်ပါဦး ကိုအောင်ရဲရယ်၊ သူတောင် အပျိုဘ၀မှာရော၊ အိမ်ထောင်သည် ဘ၀မှာပါ မက်မောခဲ့ပါတယ်ဆိုတဲ့ ကျမရဲ့အလှအပကို သူပဲ ဖျက်လိုဖျက်ဆီး လုပ်လာတယ်။ ကျမ မွမ်းမံ ထိန်းသိမ်းခဲ့လို့ပဲ သူအပါအ၀င် လူအတော်များများကို လွှမ်းမိုးလွန်းတဲ့ သိပ်လှတဲ့ မိန်းမလို့ နာမည်ကျော်ခဲ့တာပဲ ဟာ။ နာမည်ရင်း အေးအေးဦးထက် သီချင်းဆိုတဲ့၊ ကဗျာရေးတဲ့ (ငယ်နာမည်လည်းဖြစ်တဲ့) ထရီဇာဆိုတဲ့ နာမည်ကသာ ပိုပြီး ထင်ရှားခဲ့ တာရော… ကျမကိုယ်ကျမ အရောင်တင်နိုင်လွန်းလို့ပဲ မဟုတ်လား။ ကျမကိုယ် ကျမ ဘယ်လောက်မြတ်နိုးတယ်ဆိုတာ ကျမ အသိဆုံးပဲလေ။ အဲဒီမှာတင် ကျမ ကိုဝေလင်းကို ပြတ်ပြတ် သားသား ခွဲခွာဖြစ်ခဲ့တယ်။ ကျမ ထင်ပါတယ်၊ အဲဒီတုန်းက ရှင်ကသာ ယမင်းနဲ့ တွဲမနေခဲ့ရင် ကျမလည်း ကိုဝေလင်းနဲ့ ပတ်သက်ဖြစ်မှာ မဟုတ်ဘူးလို့။

+++++ ထရီဇာဆိုတဲ့ နာမည်ဟာ တက္ကသိုလ်ဝန်းကျင်မှာ သိပ်လွှမ်းမိုးဖူးခဲ့တယ်နော်။ ကျောင်းသူဘ၀မှာ အလှဘုရင်မ လို့ ကျော်ကြားခဲ့တဲ့ ကျမဟာ လှတယ်၊ ထက်တယ်၊ ချမ်းသာတယ် ဆိုပြီး လူစိတ်ဝင်စားတာကို ခံယူရရုံနဲ့ အားမရ၊ မကျေနပ်နိုင်လေတော့ ဖိုင်နယ်ရီးယားမှာ စာအပြင်းအထန်ကျက်ပြီး ဂုဏ်ထူးတန်း တက်ခွင့်ရအောင် ရယူနိုင်ခဲ့တယ်။ ပြီးကျတော့ ကျူတာဝင်ဖြေပြီး အောင်ခဲ့ပြန်ရော။

ဆရာမဘ၀မှာလည်းထရီဇာက နာမည်ကျော်ပြန်တာပေါ့။ တက္ကသိုလ်ရဲ့ ကဗျာလောကထဲမှာလည်း ထရီဇာဟာ မှတ်တိုင်လေးတစ်ခု ဖြစ်နိုင်ခဲ့တာပဲ။ ကဗျာလောကထဲမှာ ကဗျာသမားပုံစံနဲ့ နည်းနည်းလေးမှ မတူတဲ့ ကျမဟာ ထူးခြားနေခဲ့တယ်။ ရှိတဲ့မိန်းကလေး ကဗျာသည်တွေကလည်း ဆံပင်ရှည်ကြီးတွေနဲ့၊ သနပ်ခါး မလိမ်း၊ နှုတ်ခမ်းပါးနီမဆိုး၊ ရှပ်အင်္ကျီခပ်နွမ်းနွမ်းတွေနဲ့။ အဲဒီအထဲမှာ ကမ ထင်ပေါ်ခဲ့တာ မဆန်းပါဘူး။ ဒါပေမဲ့ ဒါကိုပဲ ထူးဆန်းသလို လူတွေက ကြည့်ကြတယ်။ တကယ်ထူးဆန်းတာက ဒီလောက် အလှအပ ကြိုက်ပြီး ချမ်းသာတဲ့ ထရီဇာဆိုတဲ့ မိန်းမရဲ့ အသည်းနှလုံးနဲ့ ဦးနှောက်ထဲမှာ ယောက်ျားတွေနဲ့ ရင်ဘောင်တန်းနိုင်တဲ့ ကဗျာဗီဇတွေ ရှိနေတာ။ ပြီး ရှင်တို့အဆိုအရ အင်မတန် ထက်မြက်မာကျောတဲ့၊ သွက်လက်တောက်ပတဲ့ ထရီဇာမှာ အင်မတန် သိမ်မွေ့နက်ရှိုင်းတဲ့ အနုသန္ဓေတွေ ရှိနေတာကမှ ထူးခြားသင့်တယ်လို့ ကျမ ထင်တယ်၊ ပြီးတော့ ကျမက အဲလိုပဲ ဖြစ်စေချင်တယ်။ အဲသလို ထူးထူးခြားခြား မိန်းမတစ်ယောက် ဖြစ်အောင် ကျမက ကိုယ့်ကိုယ်ကို ပုံသွင်း မွေးမြူခဲ့တာကြောင့်လည်း ကျမရဲ့ အရည်အချင်းတွေကို ဘယ်အရာနဲ့မှ မလဲနိုင်အောင် (ရှင်နဲ့တောင် မလဲနိုင်အောင်) ကျမ မြတ်နိုးတွယ်ဖက်ထားတာပေါ့… ကိုအောင်ရဲရယ်။

+++++

ရှင်နဲ့ မိန်းမတစ်ယောက်တွဲနေတယ်လို့ သတင်းထွက်လာပြန်တယ်။ ထွေးထွေး…တဲ့။ ဟိုးအရင်ကတည်းက ရှိခဲ့တဲ့ ရှင့်သတင်းမျိုးမို့ ကျမ သိပ်တော့ မစိုးရိမ်ခဲ့ဘူး။ အဲဒီတလောမှာ လက်ကမ်းကဗျာစာအုပ်တအုပ် ထုတ်ဖို့ ပြင်နေရတဲ့ ကိစ္စတွေထဲမှာ နစ်နေခဲ့တယ်။ ကိုယ်တိုင် ကားမောင်းကျောင်းတက်နိုင်တဲ့ ကျမဟာ တစ်ကျပ် ပြည့်အောင် အရင်းမရှိတဲ့ လက်ကမ်းကဗျာတစ်ရွက်ကို အင်မတန်မြတ်နိုးတာကိုတော့ ရှင်ခုထိ သဘော ကျဦးမယ်ထင်တာပဲ ကိုအောင်ရဲ။ ဘာလို့ဆို ဒီလိုမြတ်နိုးတတ်လို့လည်း ဘယ်ယောက်ျားကိုမှ ရင်မခုန် သဘောမကျခဲ့တဲ့ ကျမက ရှင့်ကို ရှင့်ကဗျာတွေကြောင့်သာ (သိပ်ရင်မခုန်ပေမဲ့) သဘောကျခဲ့ရတာ မဟုတ် လား။ ရှင့်ရဲ့ ကဗျာစိတ်ကိုတော့ ကျမ တကယ် မြတ်နိုးတာပါ ကိုအောင်ရဲ။ ရှင့်ရဲ့ ကဗျာအယူအဆ၊ ကဗျာ အပေါ်အမြင်နဲ့ ရှင်ကြိုးစားဆန်းသစ်နေတဲ့ ကဗျာ ရေစီးကြောင်းတွေကို ကျမသိပ်ကြိုက်ခဲ့တာပဲ။

ရှင်နောက်တစ်ယောက် ပြောင်းသွားပြန်တယ်။ မေမီတဲ့။ ကျမစိတ်ထဲ နည်းနည်း ရိုးသွားတယ်။ အဲဒီ ကာလမှာ ကျမတွေးတယ်၊ ရှင်နဲ့ ကွာရှင်းလိုက်ရင်ရင် ကောင်းမယ်ပေါ့။ လွတ်လပ်တဲ့ ဘ၀မှာ ကျမရဲ့ သရဖူကို ပိုပြီး အရောင်တင်လို့ကောင်းမယ်လို့ ယူဆတယ်။ ဒါပေမဲ့ နှစ်ဘက်မိဘများကို ငဲ့ကြည့်မိပြန်တယ်။ နှစ်ယောက် စလုံးက ကိုယ့်သဘောနဲ့ကိုယ် လက်ထပ်မယ်လို့ ဆုံးဖြတ်တာကို လိုက်လျောညီထွေရှိတယ်လို့ အလွယ်တကူ ခွင့်ပြုခဲ့တဲ့ မိဘတွေမို့ ကျမ ငဲ့သင့်တယ်လေ။ ဒါပေမဲ့ ရှင် အဲဒီလို တွဲနေတာကြောင့် ကျမရဲ့ သိက္ခာ ပွန်းရတာ ကိုလည်း စိတ်က သိပ်လက်မခံချင်ပြန်ဘူး။ အဲဒီမှာတင် ကဗျာသမားတွေထဲက ကျော်ကျော်ဆိုတဲ့ ချာတိတ်နဲ့ တွေ့တယ်။ ကဗျာရူးကလေးကလည်းဖြစ်တော့ ကျမရဲ့ အလှအပကို ကိုးကွယ်ချင်ပြန်သတဲ့။ ဒီလိုနဲ့ ကျမအတွက် ကျော်ကျော်ဟာ အဖေါ်ကောင်း ဖြစ်လာတယ်။ ကျမလည်း ရှင့်ကို တုံ့ပြန်ရလို့ ကျေနပ်။ သူလည်း မမကဗျာ တွေ တစ်လှေကြီး ရပေါ့။

ကြာတော့ ယောက်ျားတွေရဲ့အားနည်းချက်ဟာ အသက်ကြီးတာ ငယ်တာနဲ့ မဆိုင်မှန်း သိလာတယ်။ နှစ်ဆယ့် သုံးနှစ်သာ ရှိသေးတဲ့ ကျော်ကျော်ဟာ ကျမလို အသက်၂၇ခုနှစ်ရှိနေပြီဖြစ်တဲ့ အိမ်ထောင်သည်မိန်းမကို သူနဲ့ လက်ထပ်ရမယ်လို့ ခြိမ်းခြောက်လာရဲ့။ အသည်းကွဲသံတွေနဲ့ ကျမကို အရေးဆိုတာပေါ့။ အရက်တွေ မူးပြီး သူ ကျမရှေ့မှာ လာငိုတဲ့တစ်နေ့ကျတော့ ကျမ သူ့ကို အပြီးသတ် နှုတ်ဆက် ဖြစ်လိုက်တော့တယ်။ ယောက်ျား ဆိုတာကို တော်တော် စိတ်ပျက်သွားခဲ့တယ် ကိုအောင်ရဲ။

ကျမရဲ့စိတ် ဟိုးနက်နက်တစ်နေရာမှာတော့ သိမ်းထားတဲ့ အကြောင်းအရာတစ်ခု ရှိနေတယ်။ အဲဒါဟာ တကယ် တော့ ရှင့်ကိုပြောလို့ မဖြစ်ဘူး။ ဒါပေမဲ့ ရင်ထဲမှာလည်း ရှိနေတယ်။ ဘာလဲဆိုတော့ သေချာတာကပေါ့လေ၊ ကျမဘ၀မှာ ရှင့်လောက် သဘောကျရတဲ့ ယောက်ျား မတွေ့ဖူးသေးဘူး ဆိုတာပါပဲ။ အဲဒါကြောင့် ရှင်သိလို့ မဖြစ်ဘူးလို့ ပြောတာပဲ။ ဘာလို့ဆို ရှင့်ကို ကျမ အတိုင်းအတာတစ်ခုထိ ရင်ထဲမှာထားခဲ့တယ်ဆိုတာ ရှင်သိရင် စိတ်ပိုင်းဆိုင်ရာအရ ကျမ ရှင့်ကိုရှုံးမှာပေါ့။ ထရီဇာဟာ ဘယ်တော့မှ မရှုံးရဘူး ကိုအောင်ရဲ … သိလား။ ကျမ အရှုံးမခံနိုင်ဘူး… ။

+++++

ရှင် နဲ့ မေမီ၊ ကျမ နဲ့ ကျော်ကျော်တို့ရဲ့ ကာလမှာပဲ ရှင် နဲ့ ကျမ လုံးဝစကားမပြောတော့ဘဲ တစ်ယောက်မျက်နှာ တစ်ယောက် မကြည့်ကြတော့တဲ့ အိမ်ထောင်ဖက်တွေ ဖြစ်သွားကြ တယ်နော်။ တကယ်ဆို ဘာကြောင့်ရယ်လို့ ရေရေလည်လည် ပြောပြလို့မရတဲ့ ကိစ္စ ကလေးတွေပါ။ ကျမ အံ့သြမိတယ်။ ရှင်နဲ့ ကျမ ပစ္စည်းရှိတဲ့ ပမာဏလည်း အတူတူပဲ၊ မိဘအရှိန်အ၀ါလည်း တန်းတူပဲ။ ပညာအရည်အချင်းနဲ့ အလုပ်အကိုင်တောင် အတူတူပဲ။ နောက်ဆုံး ကလေးဆန်ဆန်ပြောရရင် ပေါ်ပြူလာဖြစ်တာချင်းတောင် အတူတူပဲ မဟုတ်လား။ လူတိုင်းက ကျမတို့နှစ်ယောက်ကို အားကျ ကျေနပ်ခဲ့ကြတာလည်း ရှင်အသိပဲ။ ရှင်နဲ့ကျမ ၀ါသနာတူ၊ ဗီဇတူ၊ ဘာလိုသေးလဲ ကိုအောင်ရဲ။ သြော်… နောက်ဆုံးအကြိမ် ပြဿနာဖြစ်ကြတုန်းက ရှင်ပြောသလို “မာနပါတူတာ ခက်တယ် ထရီဇာ” ဆိုတာပဲ ဖြစ်မယ်နော်။

“မင်းဟာ မိန်းမ၊ မိန်းမဟာ ယောက်ျားရဲ့ နောက်လိုက်ပဲ၊ မင်းကို ကိုယ် အင်မတန် ချစ်ခဲ့၊ မြတ်နိုးခဲ့တယ်၊ ဒါနဲ့တပြိုင်တည်းပဲ ကိုယ်မင်းကို ယောက်ျားပီပီ ဦးဆောင်ချင်တယ်၊ တစ်ယောက် က ဗိုလ်ဆိုရင် တစ်ယောက်က နောက်လိုက်ပဲ ဖြစ်ရမယ်၊ ဒီတော့ ပြောပါ … ထရီဇာ မင်း ဗိုလ်လုပ်မလား၊ နောက်လိုက်လုပ်မလား”

အဲဒီလို ရှင်ပြောလာတော့ ကျမ သိပ်တုန်လှုပ်သွားတယ်။ ကျမဘ၀မှာ ရှင့်ကို အိမ်ဦးနတ် အရာထားခဲ့တာ ကျမအသိဆုံးပေါ့။ ကိုယ့်ယောက်ျားကို “မိုင်ပက်တ်(My pet)”လို့ ပြောတတ်တဲ့ မိန်းမစားတွေ၊ “တို့ယောက်ျားက တို့သေဆို သေ၊ ရှင်ဆို ရှင်ပဲ” လို့ ပြောတတ်တဲ့ မိန်းမတွေကို အင်မတန် စက်ဆုပ်တဲ့ မိန်းမပဲ။ ခု ရှင်က ဒီလို ပြောလာတော့ ကျမ အံ့သြမှုကြောင့် တုန်လှုပ်သွားတာပေါ့။

“နေပါဦး ဒါလင်၊ ခုချိန်ထိ ထရီဇာ ဒါလင့်ကို မတိုင်ပင်ဘဲ အိမ်ဖော်ခန့်တာက အစ၊ ကဗျာစာအုပ် ထုတ်တာအထိ လုပ်ဖူးလား၊ ပြီးတော့ ဒါလင့်ကို မစောင့်ဘဲ ထမင်းတောင် စားဖူးရဲ့လား၊ စိတ်ဆိုးပြီးတော့ အော်ဖူးလား၊ ယူတွေ အိုင်တွေနဲ့တောင် မပြောခဲ့ပါဘူး ဒါလင်…၊ တစ်ယောက်နဲ့ တစ်ယောက် ဘ၀အဖော်တွေအဖြစ် လက်ခံခဲ့ပြီးကတည်းက ထရီဇာ ဒါလင့်ကို အိမ်ဦးနတ်အနေနဲ့ ရိုသေခဲ့တယ်လို့ ယုံကြည်တာပဲ”

လို့ ကျမ ပြန်ပြော တော့ ရှင်က ကျမကို မျက်လုံးပြူးပြီး ကြည့်လာပြန်ရော။၊ ပြီးတော့…

"မသိဘူးလား ထရီဇာ၊ မင်းကိုယ့်ကို ခွင့်တောင်းတာမဟုတ်ဘူး၊ တိုင်ပင်တာမဟုတ်ဘူး၊ အသိပေးတာ သက်သက်ပဲဆိုတာ၊ ကဗျာစာအုပ်ထုတ်ရမလားလို့ ပြောတာမှ မဟုတ်ဘဲ၊ ကဗျာစာအုပ်ထုတ်မလို့-လို့ အသိပေးတာပဲ။ ပြောတာကတော့ လေအေးအေးနဲ့ပါပဲ၊ ဒါပေမဲ့ ခံရတဲ့ကောင်က မသက်သာဘူး ထရီဇာ၊ ဒီမှာ ကိုယ် လိုချင်တာက ရက်စ် အော် နိုး၊ ဘလက် အန် ၀ှိုက်တ် ပဲ။ ကဲ… ပြောပါ၊ ခင်ဗျား ဗိုလ်လုပ်မလား၊ နောက်လိုက်လုပ်မှာလား”

ရှင်အဲလိုပြောရင် ကျမရဲ့ မခံချင်စိတ်တွေ ရောက်လာရော။ အဲလောက်တောင် နားမလည်ချက် ဆိုးလှချည် ကောလို့ တွေးမိရင်း…

“ဒါလင်ပြောတာကို ထရီဇာ လက်မခံနိုင်သေးတာ ခက်တယ်၊ တစ်ယောက်နဲ့ တစ်ယောက် အပေး အယူမျှရမယ့် လင်မယားဘ၀ပါ ဒါလင်ရဲ့။ တပ်ဖွဲ့တစ်ဖွဲ့မဟုတ်ပါဘူး၊ ဗိုလ်တွေ၊ ရဲဘော်တွေ မလိုပါဘူး၊ ထရီဇာ့ကို စိတ်ညစ်အောင် မလုပ်ပါနဲ့”

လို့ပဲ ပြန်ပြောခဲ့တယ်။

ရှင်ကတော့ ဒေါသမပြေပါဘူး၊ နီရဲခက်ထန်တဲ့ မျက်လုံးတွေနဲ့ ကျမကို စိုက်ကြည့်ပြီး….

“ပြီးတာပါပဲ ထရီဇာ၊ ကိုယ်နဲ့မင်း ညှိမရပါဘူး၊ ဒီတော့ အကောင်းဆုံးကို စဉ်းစားထားပါ၊ တို့တစ်ခုခု ရင်ဆိုင်ပစ်လိုက်တာ ကောင်းပါတယ်၊ ဟုတ်လား”

လို့ပြောပြီး ရှင် ထွက်သွားခဲ့တယ်။ နောက် တစ်လနဲ့ငါးရက်တိတိကြာမှ အိမ်ကို ပြန်လာခဲ့တယ်နော်။ ခရီး မထွက်၊ အလုပ်သွားမပျက်ပါဘဲနဲ့ ရှင် ကျမနဲ့ အဝေးမှာ နေခဲ့တယ်။ ခင်ပွန်းသည်ကို မျက်နှာချင်းဆိုင်တွေ့ရလို့မှ ပြုံးပြမရ၊ နှုတ်ဆက်မရတဲ့ မ်ိန်းမတစ်ယောက်အနေနဲ့ ကျမ ရှင်ပြန်အလာကို စောင့်နေခဲ့တယ်။ သိပ်လည်း သတိရနေခဲ့တယ် ကိုအောင်ရဲ။ (ရှင်ကတော့ မယုံဘူးလို့ ပြောဦးမှာပါပဲ)။

အဲဒီပြဿနာဟာ ကျမတို့နှစ်ယောက်ရဲ့ အပြင်းထန်ဆုံး ပေါက်ကွဲမှုဖြစ်ခဲ့တယ်။ အဲဒီနေ့မှာ စတင်ခဲ့တဲ့ တိတ်ဆိတ် ခြောက်သွေ့မှုဟာ ရှင်နဲ့ ကျမကြားမှာ ဒီနေ့ထက်ထိ တည်မြဲနေဆဲပဲနော် ကိုအောင်ရဲ။

+++++

ကျမ ခဏခဏ စဉ်းစားဖြစ်တယ်။ ကျမတို့နှစ်ယောက်ဟာ သမားရိုးကျ မဟုတ်တာတွေကို သဘောကျတဲ့ နေရာမှာလည်း တူကြတယ်မဟုတ်လား။ အဲဒါကြောင့်ပဲ ကျမတို့ စိတ်သောက ရောက်နေကြရတာလားလို့ တွေးမိတယ်။

ကြည့်လေ၊ သမားရိုးကျအနေနဲ့ဆို ယောက်ျားနဲ့ မိန်းမ တစ်ယောက်ကို တစ်ယောက် သဘောကျမယ်၊ ပြီးရင် ပရိုပို့စ်လုပ်မယ်၊ ချစ်သူတွေဖြစ်မယ်၊ မိဘသဘောတူတူ၊ မတူတူ လက်ထပ်ကြမယ်။ ဒါက တစ်မျိုး၊ နောက် တစ်မျိုးက တစ်ယောက်နဲ့ တစ်ယောက် ဘယ်လိုသဘောထားရမှန်းတောင် မသိခင်မှာ မိဘတွေကြောင့် စေ့စပ်လိုက်မယ်၊ နောက် လက်ထပ်ကြမယ်။ လင်မယားဘ၀ရောက်တော့ ချစ်သွားကြရော။ အဲဒီ နှစ်မျိုး စလုံး ဟာ တစ်နည်းနည်းနဲ့တော့ အဆင်ပြေကြတယ်။ ရှင်နဲ့ ကျမကတော့ တစ်ယောက်နဲ့ တစ်ယောက် သဘောကျ နေတုန်း ရှင်က လက်ထပ်ခွင့်တောင်း၊ ကျမက ခေါင်းညိတ်၊ အိမ်ကို ဖွင့်ပြောပြ၊ သဘောတူတော့ လက်ထပ်၊ အင်းလျားလိတ်မှာ ဧည့်ခံပွဲလုပ်၊ နှစ်ဖက်မိဘလက်ဖွဲ့တဲ့ ခြံနဲ့အိမ်နဲ့ ကားတစ်စင်းစီနဲ့။ ဒါပေမဲ့ အဆင်မပြေ ဖြစ်ခဲ့ရတယ်။

တကယ်ဆို ရှင်ကလည်း ကျမကို ပရိုပို့စ်လုပ်ကတည်းက “ကိုယ်ထရီဇာ့ကို သဘောကျတယ်၊ လက်ထပ် ချင်တယ်”လို့ ပြောမယ့်အစား “ထရီဇာ့ကို သိပ်ချစ်တယ်”လို့ မွတ်မွတ်သိပ်သိပ် ပြောခဲ့ဖို့ ကောင်းတယ်။ အဲလိုသာပြောခဲ့ရင် ကျမလည်း ရင်ခုန်မိချင်ရင် ခုန်မိခဲ့မှာပဲ။ ဆိုရင်… ကျမတို့နှစ်ယောက် သမားရိုးကျ ချစ်သူတွေလို သိပ် ပျော်စရာ ကောင်းမှာပဲလို့ အခု ကျမ ယူဆနေတယ်။ ခုတော့ လက်ထပ်သက် အတော်ကြာမှ “ကိုယ်ထရီဇာ့ကို ချစ်ပါတယ်ကွာ”ဆိုတဲ့ အောင့်သက်သက် စကားသံကြောင့်သာ၊ သြော်… သူ ငါ့ကို ချစ်တော့ ချစ်သားပဲလို့ လက်ခံနိုင်ခဲ့ရတာမဟုတ်လား။ ဒါမှမဟုတ်လည်း ရှင် ကျမကို ပရိုပို့စ်လုပ်တဲ့နေ့နဲ့ ကျမတို့လက်ထပ်နေ့ဟာ ခြောက်လလောက်ပဲ ကွာခဲ့တာကြောင့်များ ကျမတို့ အဆင်မပြေဖြစ်ခဲ့ရတာလား လို့လည်း တွေးမိသေးတယ်။ မဟုတ်ရင်လည်း ရှင်နဲ့ ကျမ ချစ်သူလို မနေခဲ့ဖူးလို့၊ ဒါမှမဟုတ် ပြေပြစ်ချောမွေ့တဲ့ အိမ်ထောင်ရေးကို အလွယ်တကူရခဲ့လို့၊ ဒါတွေကြောင့်ပဲလား ကျမ တွေးတယ်။ ဘာကြောင့်ပဲဖြစ်ဖြစ်ပါလေ၊ ခုအခြေအနေလောက်ထိတော့ မဆိုးရွားသင့်ဘူးလို့ ကျမထင်တယ် ကိုအောင်ရဲ ရယ်.. နော်။

+++++

သားသမီး မယူခဲ့ကြတာကတော့ နှစ်ဦးလုံးသဘောကျ ဆုံးဖြတ်နေခဲ့တာမို့ ပြဿနာတည်ရာ ဖြစ်မယ်မထင်ပါ ဘူး။ နှစ်ယောက်စလုံးကလည်း မဟာဝိဇ္ဇာကျမ်းပြု မပြီးကြသေးတော့ ကျောင်းကိစ္စတွေအားလုံးပြီးမှ သားသမီး ယူမယ်လို့ ဆုံးဖြတ်ခဲ့ကြတာ မဟုတ်လား။ တစ်ယောက် ကားတစ်စီးစီ၊ ကျောင်းစာတွေလုပ်၊ ကိုယ့်ဝါသနာတွေ အကောင်အထည်ဖော်၊ ကဗျာရေး၊ ပန်းချီဆွဲနဲ့။ ကျမ ကျေနပ်သလို ရှင်လည်း ကျမနည်းတူ စာဖတ်၊ ကဗျာရေး၊ အရက်သောက်ပြီး သူငယ်ချင်းတွေနဲ့ ပျော်သလိုနေနေခဲ့ရတာပဲ မဟုတ်လား။ လွတ်လပ်တဲ့ ဘ၀ကို ရှင် နှစ်သက်တယ်ဆို…။ ကျမ ချုပ်နှောင် ထိန်းသိမ်း မထားခဲ့တာ သေချာပါတယ်။

+++++

ရှေ့ပြောနောက်ပြော မညီတဲ့နေရာမှာလည်း ရှင်က စံပြပါပဲ။ (တကယ်တော့လည်း ယောက်ျားတိုင်းလိုလိုပါပဲ)။ ရှင်ကိုယ်တိုင် ကျမရဲ့ ယောက်ျားလေးမိတ်ဆွေထဲက တစ်ယောက် ဖြစ်ခဲ့လျက်နဲ့ ကျမ ယောက်ျားမိတ်ဆွေ များတာကို ခုမှ သဘောမကျပြန်ဘူး တဲ့။ ကျမက…

“အဲလိုတွေ မပြောပါနဲ့ ဒါလင်ရယ်၊ ထရီဇာ့ကို ဒါလင့်မိန်းမမှန်း ပတ်ဝန်းကျင်တစ်ခုလုံးက သိသားပဲဟာ။ ပြီးတော့ ထရီဇာ့အပေါင်းအသင်းတွေကလည်း အသစ်တွေမှမဟုတ်တာ၊ ဒါလင်နဲ့ ထရီဇာ သူငယ်ချင်းဘ၀ ကတည်းက အတူဆက်ဆံခဲ့တဲ့ လူတွေပဲဟာ”

လို့သာ လေသံအေးနဲ့ ချော့ပြောပြော တုံ့ပြန်ခဲ့တဲ့ မိန်းမပါ။ ရှင်ပြောသလိုသာ ကျမဟာ တကယ် မာနကြီး၊ မာကျောတဲ့ မိန်းမဆိုရင်…

“ယူစကားပြောတာ ကြည့်ပြောနော်၊ အိုင်တို့က ကိုယ့်အဆင့်နဲ့ကိုယ် နေတာ၊ မစော်ကားနဲ့။ ဟိုးအရင် ကတည်းက အိုင် ဒီလိုနေလာခဲ့တာ၊ ခုမှ ဖောက်ပြန်တာမဟုတ်ဘူး၊ မှန်တာလုပ်တာ”

ဆိုတဲ့ စကားလုံး မျိုးတွေ နဲ့ ရှင့်ကိုပြန်အော်မှာပေါ့ ဒါလင်ရယ်။ အခု ရှင်၊ ကျမလို့ သုံးနေရတာတောင် ကျမစိတ်ထဲမှာ တော်တော် ထိခိုက်ရပါတယ်။ ဒါပေမဲ့ အရင်ကလို ဒါလင်လို့ သုံးရမှာကိုတော့လည်း ရှက်နေ တယ် လေ။

ယောက်ျားလေးမိတ်ဆွေတွေနဲ့ လက်ဖက်ရည်ဆိုင်ထိုင်တာ၊ မဂ္ဂဇင်းတိုက်က လူတွေနဲ့ စကားပွဲတွေ ဖွဲ့တာ၊ ထရီဇာရယ်လို့ နာမည်ကျော်လွန်းတာတွေကို ရှင်မကြိုက်ဘူးတဲ့။ 'ယောက်ျားကို ထမင်းဟင်း သေချာချက် ကျွေးတဲ့…၊ ယောက်ျားရဲ့ အ၀တ်တွေကို ကိုယ်တိုင်လျှော်ဖွတ်၊ မီးပူတိုက်ပေးတဲ့၊ ယောက်ျားလုပ်သမျှ အထင်ကြီး ခေါင်းညိတ်တတ်တဲ့…၊ ထုံထုံထိုင်းထိုင်းမိန်းမတစ်ယောက်ကို ဇနီးမယားအဖြစ် ရွေးချယ်မိခဲ့ရင်တောင် ငါ စိ်တ် ချမ်းသာရဦးမှာ' တဲ့။ အရက်မူးလာတဲ့ တစ်ညမှာ ရှင်ပြောခဲ့တာလေ။ ကျမ သွေးဆူခဲ့ရတဲ့ စကားပေါ့။ အဲဒီညက စလို့ ရှင့်နဲ့ကျမ ပဋိပက္ခတွေ စခဲ့တာနော်။ မှတ်မှတ်ရရ အိမ်ထောင်သက်တစ်နှစ် မပြည့်တပြည့်မှာနော်။

ကျမက ပြောတယ်။

“ကျမ ဖြည့်ဆည်းပေးမှ ပြည့်စုံမယ့်ကိစ္စမှန်သမျှမှာ ဒါလင် ဘယ်တုန်းက လိုအပ်နေရဖူးလဲ၊ ဒါလင့်ဝေယျာဝစ္စအသေးအဖွဲတွေကို လုပ်ပေးမယ့်သူတွေ ရှိနေတာပဲ။ အမေစိုးဆိုရင် ထရီဇာ ငယ်ငယ်ကတည်းက ထမင်းဟင်းချက်ကျွေးလာတာ၊ နီနီဆိုလည်း အ၀တ်စင်အောင်လျှော်၊ မီးပူပြန့်အောင် တိုက်နိုင်တာပဲ။ ထရီဇာမပါလည်း ဖြစ်နေတာပဲ၊ ပြီး ဒါလင့်အတွက် ထရီဇာ လုပ်ပေးမှ ဖြစ်မှာမှလည်း မဟုတ်တာ”

လို့ ပြန်ပြောတော့ ရှင် လက်မခံပြန်ဘူး။ ရှင်လုပ်သမျှ ခေါင်းညိတ်ထောက်ခံဖို့ ဆိုပြန်တော့လည်း ကျမကို အလုပ်ထွက်ခိုင်းတာ၊ ကလေးတွေမွေးပြီး ရှင့်ဝတ်ကြီးဝတ်ငယ်တွေ ပြုစုဖို့သာ လုပ်ခိုင်းတာကျတော့လည်း ကျမ ဘယ်လိုခေါင်းညိတ်နိုင်မလဲ ကိုအောင်ရဲရယ်။ အဓိပ္ပါယ်လည်း မရှိလှဘူးလေရှင်။ အဲဒါတွေက ရှင်နဲ့ ကျမရဲ့ လင်မယားဘ၀အတွက် မရှိမဖြစ် လိုအပ်ချက်လား ပြောလေ။

တကယ်တော့ ဘာမှ မပြောပလောက်တဲ့ ကိစ္စလေးတွေကိုပဲ ရှင်က ရေးကြီးခွင်ကျယ် လုပ်ပြီး ခံစားယူနေတာ လို့ ကျမ ထင်တယ်။ ကျမ စိတ်ပျက်မိခဲ့တာ အမှန်ပါပဲ။

+++++

နောက်ပိုင်းကျတော့ ရှင့်သတင်းတွေ ပိုစိပ်လာတယ်။ တပည့်မတွေနဲ့တောင် တွဲနေသတဲ့။ အိမ်ထောင်သည် ယောက်ျားတစ်ယောက်ဖြစ်ပြီး ပျက်စီးနေတဲ့ မိန်းမတွေဆီမှာလည်း အိပ်သတဲ့။ ကျမ ရှင့်ကို ရွံလာတယ်။ ရှင့်သတင်းအားလုံးကို နားပိတ်နေလိုက်တော့တယ်။

နားပိတ်နေခဲ့တာ အကြာကြီးကြာပြီးမှ နားပိတ်ဆန့်ကျင်နေလို့ မရတော့လောက်အောင် ကျယ်လောင်တဲ့ သတင်းတစ်ခု ကျမ ကြားရတယ်။ ရှင် အခု ကောင်မလေး တစ်ယောက်တည်းနဲ့ပဲ တွဲတော့တယ်တဲ့။ အဲဒီ မိန်းကလေးနဲ့ တွဲနေခဲ့တာ ခြောက်လကျော်လောက် ရှိပြီတဲ့။

ကျမ နည်းနည်း အံ့သြသွားတယ်။ ဘာလို့ဆို ဘယ်သူနဲ့မဆို ရှင်အကြာဆုံးတွဲတာ တစ်လပဲ မဟုတ်လား။ ကျမ အဲဒီမိန်းကလေးကို မြင်ဖူးအောင် ကြည့်ခဲ့တယ်။ ကြားရ အောင် စုံစမ်းခဲ့တယ်။ “ဖြူလဲ့ကျော်”တဲ့။

တကယ်လည်း ဖြူဖြူလဲ့လဲ့ကလေး။ ခါးလောက်ရှည်တဲ့ ဆံပင်ညိုညိုတွေနဲ့၊ လှပါတယ်။ ဒါပေမဲ့ ကျမထက် သာနိုင်တာတော့ မရှိပါဘူး။ သူက ငယ်ဂုဏ်သာတယ်ဆိုတောင် ကျမက ပကာသနဂုဏ်၊ သမ္ဘာဂုဏ် သာတာပဲ မဟုတ်လား။ ပြီးတော့ ငယ်လှတယ်တော့ မဟုတ်ပါဘူး။ နှစ်ဆယ့်တစ်၊ နှစ်ဆယ့်နှစ်လောက်ပါပဲ၊ သူနဲ့ရှင် တော်တော်တွဲနေကြတယ်တဲ့။ ရှင်တို့တွဲနေကြတာ ကိုးလကျော်ကြာသွားတဲ့ အချိန်မှာတော့ ကျမ စောင့်ကြည့် နေလို့ မရတော့ဘူး။ ပတ်ဝန်းကျင်က ကျမကို လှုံ့ဆော်လာတယ်။ ပတ်ဝန်းကျင်ရဲ့ အသံတွေထဲမှာ ထရီဇာ့ကို သနားတဲ့ အသံတွေပါလာရင်တော့ ကျမ စိတ်ထဲမှာ အနာကျင်ရဆုံးပါပဲ။ ကျမ မာနက ကျမကို ပြန်သရော် တယ်။ အရင်အခြေအနေလို ကိုဝေလင်း၊ ကျော်ကျော်တို့ကို ခုတုံးလုပ်ပြီး ရှင့်ကို ပညာပြနေခဲ့တဲ့ ထရီဇာ ဆိုရင်တော့ ခုချိန်မှာ ထရီဇာလည်း အဆိုးပေါ့။ ခုတော့ ထရီဇာကလည်း ကိုယ့်အလုပ် ကိုယ်လုပ်ပြီး အေးအေးဆေးဆေး နေလေတော့ လူတွေက ရှင့်အဆိုးသက်သက်ပေါ့။

ရှင့်ကိုယှဉ်ပြိုင်တာမဟုတ်ပါဘူး ကိုအောင်ရဲ။ ကျမကိုယ်ကျမ ရှင့်ထက် ပို ချစ်တယ် ထင်တာမို့ ကျမ အနိုင်ယူ ရပါမယ်။ ကျမ ရှင့်ကို ပြောဖို့ ဆုံးဖြတ်လိုက်တယ်။

“ကိုအောင် ခုတွဲနေတဲ့ ဖြူလဲ့ကျော်ကို ဖြတ်လိုက်ပါ၊ ထရီဇာလည်း သည်းမခံနိုင်ဘူး၊ ပတ်ဝန်းကျင်မှာ ထရီဇာ သိက္ခာကျပါတယ်”

ရှင်က ကျမကို တည်ငြိမ်တဲ့ မျက်လုံးတွေနဲ့ ပြန်ကြည့်တယ်။ ကျမ အံ့သြသွားတယ်။ ရှင် ကျမကို ဒေါသနဲ့ တုံ့ပြန်မယ် ထင်ထားတာကိုး။

“ကိုယ်လည်း ထရီဇာကိုပြောဖို့ပါပဲ။ အခြေအနေကြည့်နေတာ… ကိုယ် ဖြူလဲ့ကို လက်ထပ်ဖို့အထိ ရည်ရွယ် ပါတယ်။ အဲဒါ .. ထရီဇာနဲ့… ကွာရှင်းဖို့...”

ကျမရင်ထဲ မီးတောင်တစ်ခု ပေါက်ကွဲသွားတယ်။ တကယ်ပဲ ပူပြင်း လောင်မြိုက်သွားတယ်။ ရှင်က ဖြူလဲ့ကျော် ကို ကျမထက် မက်မောတယ်လား။ ဒါဆို ကျမက ဖြူလဲ့ကျော်ကို ရှုံးရမယ်ပေါ့။ ခေါင်းထဲမှာ ဦးနှောက်က အလုပ်လုပ်လွန်းနေတယ်။ ကျမ ရှင့်ကို လှလှပပ ပြုံးပြလိုက်တယ်။

“ဘယ်ဖြစ်မလဲ ကိုအောင်ရဲရယ်၊ ကျမက လူ့အရိုသေတန် တစ်ခုလပ် အဖြစ်ခံရမယ်လား၊ ဘာမဟုတ်တဲ့ မိန်းမငယ် တစ်ယောက်အတွက် ရှင့်ဘေးက ကျမရဲ့ နေရာကို ဖယ်ပေးရမယ်လား၊ ကျမ ကွာရှင်းခွင့် မပေးနိုင် ပါဘူး”

လေသံအေးနဲ့ တုံ့ပြန်လိုက်တယ်။ ရှင့်ဒေါသမျက်လုံးတွေကို ခဏ တွေ့လိုက်ရတယ်၊ ပြီးတော့ ထုံးစံအတိုင်း ရှင်ထွက်သွားတယ်။

+++++

ကျမရှေ့မှာ ဖြူလဲ့ကျော် ထိုင်နေတယ်။ သူ့ကို တစ်ခုခုသောက်ပါလို့ပြောပေမဲ့ သူ မသောက်ဘူး။ “မမ ပြောစရာရှိတာ ပြောပါ” တဲ့။ ကျမကလည်း ပြောလိုက်ပါတယ်။

“ကိုယ် ဘာပြောမယ် ဆိုတာ မင်းသိပြီးသား ဖြစ်မှာပါ”

ထူးထူးခြားခြားပဲ ကောင်မလေးက တုန်လှုပ်မနေဘူး သိလား… ကိုအောင်ရဲ။ ပြီးတော့ ကျမကို ပြန်ပြောတယ် ။

“သိတာတော့သိပါတယ် မမ၊ ဒါပေမဲ့ စကားလုံးအတိအကျနဲ့တော့ ဘယ်သိပါ့မလဲ၊ လေသံချင်း၊ ပြောတဲ့ အဓိပ္ပါယ်ချင်း ကွာနိုင်ပါတယ်” တဲ့။

လေသံတိုးတိုးလေးက ပြတ်သားနေတယ်။ ကျမရင်ထဲမှာ ခုန်သွားသလိုပဲ သိလား.. ကိုအောင်ရဲ။ ကျမ ပြောရ တော့တယ်။

“ကိုအောင်ရဲနဲ့ မင်းကိစ္စ ပြီးဆုံးပစ်လိုက်ဖို့ပါပဲ”

သူ့မျက်နှာကလေးက ပိုတည်သွားတယ်။ မျက်ရည်ကြည်တွေ ဝေ့လာတယ်။ မျက်လုံးတွေက တောက်ပ လာတယ်။

“ဆရာက မေတ္တာငတ်နေတယ်၊ ဖြူလဲ့ကလည်း မေတ္တာငတ်နေတယ်၊ ဖြူလဲ့တို့နှစ်ယောက် ရိုးရိုးကလေးပဲ တွေ့ကြပါတယ်။ ဖြူလဲ့က ဆရာ့တပည့်မဟုတ်ဘူးဆိုတာလည်း မမ သိပြီး ဖြစ်မှာပါ၊ ဆရာအလုပ်လုပ်တဲ့ လူမို့ရော၊ မမရှေ့မှာမို့ရော ဆရာလို့ သုံးတာပါ၊ ဖြူလဲ့က သူ့ကို ကိုကိုလို့ခေါ်ပါတယ် မမ”

ကျမ မငိုဖူးသေးဘူး ကိုအောင်ရဲ။ ဒါပေမဲ့ ဆို့နစ်ဖူးတယ်။ ခံစားတတ်တယ်။ ရှင်သိတယ်မဟုတ်လား… ကျမရဲ့ အနုသန္ဓေကို။ အခု ကျမ သိပ် စိတ်လှုပ်ရှားသွားတယ်။ “ထရီဇာ့ နာမည်ကလေးက သိပ်အေးတာ၊ အေးအေးဦးဆိုတဲ့ နာမည်ကလေးကို စိတ်ဝင်စားခဲ့တာ။ ဒါပေမဲ့ ထရီဇာကိုယ်တိုင်က ‘အေး’လို့ ပြင်ပြောမှ ကိုယ်လည်း ပြောလို့ ကောင်းမှာပေါ့၊ ပြီးတော့ ကိုယ့်ကိုလည်း ‘ကိုကို’လို့ခေါ်လေ၊ ဒါမှမဟုတ် ‘မောင်’လို့ပဲ ဖြစ်ဖြစ်ပေါ့”တဲ့။ ရှင်ပြောခဲ့ဖူးတဲ့စကားကို သတိရတယ်။ “ရှက်လို့ပါ ကိုအောင်”လို့ ကျမတုံ့ပြန်တော့ “ကိုအောင်..လို့ကတော့ ဘယ်သူမဆို လူတိုင်းက ကိုယ့်ကို ခေါ်တာပဲ၊ အေးက ကိုယ့်ရဲ့ သာမန်လူမှ မဟုတ်ဘဲ” ဆိုတော့ ကျမ တော်တော်အားယူပြီး ‘ဒါလင်’လို့ ခေါ်ဖြစ်ခဲ့တာလေ။ ကျမက သိပ်ချစ်တယ်လို့ ပြောရမှာကိုတောင် ရှက်လို့ ဒီနေ့ထိ ပြောမှ မပြောဖြစ်ခဲ့တာပဲ။

“အမြဲတမ်း ‘ကိုကို’လို့ ရည်ညွှန်းပြောနေကျမို့၊ မှားပြောမိရင် မမ ထရီဇာမကြိုက်မှာစိုးလို့ ကြိုပြောထားတာပါ။ ဖြစ်နိုင်ရင် ဖြူလဲ့နဲ့ ကိုကို့အကြောင်း တော်တော်များများ ပြောပြချင် ပါတယ်။ ဘာလို့ဆို မမထရီဇာဟာ ဖြူလဲ့လေးစားတဲ့ သဘောကျတဲ့ အတုယူချင်ခဲ့တဲ့ ဆရာမတစ်ယောက် ဖြစ်နေလို့ပါပဲ”

ကျမ ခေါင်းညိတ်ပြလိုက်တော့မှ သူ စကားဆက်ပါတယ်။

“ကိုကိုက သိပ်နုနယ်ပါတယ်မမ၊ သူ့ကဗျာတွေကို ဖြူလဲ့ သိပ်ကြိုက်ခဲ့တာပါ။ မမ ကဗျာတွေကိုလည်း ဖြူလဲ့ သိပ်ကြိုက်ပါတယ်၊ မမတို့နှစ်ယောက်ဟာ ဖြူလဲ့အတွက် အိပ်မက်တစ်ခုပါပဲ။ အဲဒီအ်ိပ်မက်ကလေးကို ဖြူလဲ့ ထိုင်ကြည့်နေခဲ့တာ မမ လက်ခံလား မသိဘူး။ အဖြစ်အပျက်က ကိုယ့်အဖြစ်အပျက်ပေမဲ့၊ ဘေးလူကသာ ပိုမြင်နိုင်တယ် ဆိုတာကို၊ ဒါပေမဲ့ အဲဒီဘေးလူက အတ္တတော့ ကင်းရမှာပေါ့လေ။ ဖြူလဲ့ တစ်ခုတော့ မှားခဲ့တယ်၊ မမနဲ့တော့ နီးစပ်အောင် မကြိုးစားခဲ့တာ တစ်ခုပေါ့။ မမရဲ့ အရှိန်အ၀ါကို ဖြူလဲ့လန့်နေခဲ့တာကြောင့်ပါပဲ။ ဖြူလဲ့ ကိုကိုနဲ့ အနီးစပ်ခံခဲ့တာပါ၊ ကိုကို မိန်းကလေးတွေ၊ ပြီးတော့ ခပ်ပေါ့ပေါ့ မိန်းကလေးတွေနဲ့ပေါ့လေ၊ သိပ်တွဲလွန်းလာတာနဲ့ ကိုကို့ကို ဖြူလဲ့ ငြိတွယ်ဖို့ ကြိုးစားခဲ့တာ။ ချစ်သူအဖြစ် မရည်ရွယ်ခဲ့ဘူး မမ၊ မိန်းကလေး တစ်ယောက်ရဲ့ စိတ်သဘောကို နားလည်အောင် ပြောပြ၊ နေပြဖို့သာ ရည်ရွယ်ခဲ့တာပါ။ ဖြူလဲ့ မမကို ကဗျာတွေကတဆင့် နားလည်တယ်လို့ ထင်ခဲ့တာကိုး”

ကျမ ငြိမ်ပြီး နားထောင်နေမိတယ်။ သူကလည်း စိတ်ပါလက်ပါပဲ ပြောပြတယ်။ ကျမကို ရှင်နားလည်အောင် သူကြိုးစားရှင်းပြခဲ့တယ် ဆိုတဲ့အကြောင်းတွေပေါ့။ ဒါပေမဲ့ ရှင်က လက်မခံခဲ့ဘူး ဆိုတာရောပေါ့။

“နောက်ဆုံးတော့ မမရယ်၊ စိတ်လေနေတဲ့ ကိုကို့ကို ထိန်းပေးရင်း ကိုကိုက ဖြူလဲ့ကို သိပ်တွယ်တာလာတယ်၊ ဖြူလဲ့လည်း ကိုကို့ကို ချစ်သွားတယ်။ ကိုကိုနဲ့ ဖြူလဲ့ ဘ၀ထဲမှာတော့ မာနမရှိပါဘူး မမ”

ကျမဟာ စားပွဲပေါ်မှာရှိတဲ့ စပတ်ကလင်ခွက်ထဲက ရေခဲတုံးကလေးတွေလို အရည်ပျော်သွားချင်စိတ် ပေါ်မိ တယ်။ သူ့ရဲ့ နောက်ဆုံးစကားမှာ ကျမ ဒဏ်ရာရသွားသလား။ ရင်ထဲမှာ နာကျင်သွားတယ်။ သူ စကားပြောနေ တဲ့ တလျှောက်လုံး သူ့အပေါ် ကရုဏာရှိနေခဲ့တဲ့ ကျမရင်ထဲကို နောက်ဆုံးစကားက အမုန်းအနေနဲ့ ၀င်လာ တယ်။ ကျမ သူ့ကို စိမ်းစိမ်း ကြည့်ပစ်လိုက်တယ်။ သူကလည်း ကျမကို မျက်လုံးဝိုင်းတွေနဲ့ ပြန်ကြည့်နေတယ်။ သူ့မျက်လုံးတွေထဲမှာ အံ့သြရိပ်တွေ တွေ့တယ်။ ကျမကိုယ်ကျမ သတိမထားမိချိန်မှာပဲ ကျမ ဖြူလဲ့ကို စကားတွေ အများကြီး ပြောဖြစ်လိုက်တယ်။

“မိန်းမတစ်ယောက်မှာ သည်းခံနိုင်စွမ်း အတိုင်းအတာတစ်ခုတော့ ရှိတယ်၊ မင်းမှာလည်း ရှိမှာပါပဲ။ အဲဒီ အတိုင်းအတာဟာ အဲဒီမိန်းမရဲ့ ပိုင်ဆိုင်မှုရလဒ်အပေါ်မှာ မူတည်တယ်။ ပိုင်ဆိုင်မှု ပမာဏ များတဲ့ မိန်းမတစ်ယောက်ရဲ့ သည်းခံနိုင်စွမ်းအတိုင်းအတာဟာ သာမန် မိန်းမတစ်ယောက် ထက်တော့ နိမ့်မှာပဲ။ အင်မတန် လှတယ်၊ ထက်တယ်၊ ပြည့်စုံတယ်ဆိုတဲ့ မိန်းမတစ်ယောက်ဟာ ဘယ်လောက်မာနကြီးမယ်၊ ကိုယ့်ကိုယ်ကို ယုံကြည်မှုရှိမယ်ဆိုတာ အင်မတန်တော်ပါတယ်ဆိုတဲ့ ကိုအောင်ရဲ သိဖို့ကောင်းတယ်။ ပြီးတော့ မင်းလည်း သိဖို့ ကောင်းတယ်။ အထူးသဖြင့် ကိုယ့်လို မိန်းမတစ်ယောက်ကို ပိုင်ဆိုင်ချင်တဲ့ ယောက်ျားတစ်ယောက်ဟာ ‘မာန’ ကိုတော့ ရင်ဆိုင်ရမယ် ဆိုတာကိုပေါ့၊ ကိုယ်ပြောချင်တာ၊ ဒါပါပဲ”

ကျမ လှည့်ထွက်လာခဲ့တယ်။ ထူးဆန်းစွာပဲ ဒီစကားဝိုင်းမှာ ဘယ်သူနိုင်တယ်၊ ဘယ်သူရှုံးတယ်ကို ဆုံးဖြတ် တတ်တဲ့ ကျမရဲ့ဗီဇကို ကျမ မေ့နေခဲ့တယ်။ အဲဒီနေ့က အိမ်ပြန်ရောက်တော့ ကျမ ငိုတယ် ကိုအောင်ရဲ။ သည်းသည်းထန်ထန် ငိုတယ်၊ နားထဲမှာ “ဖြူလဲ့လည်း ကိုကို့ကို ချစ်သွားတယ်”ဆိုတဲ့ ဖြူလဲ့ကျော်ရဲ့ အသံက ပဲ့တင်ထပ်နေတယ်။ ငိုလို့အားရတော့မှ ကျမ ဘယ်သူမှ မကြားအောင် တိုးဖွဖွကလေး ပြောလိုက်တယ်။

“ကိုယ်ရှုံးပါတယ် ဖြူလဲ့ရယ်”....လို့။

(ဟုတ်တယ်လေ၊ ကျမ ရရမယ့် အချစ်ကို သူပိုင်ဆိုင်ရပြီဆိုကတည်းက ကျမ ရှုံးခဲ့တာ မဟုတ်လား။ ပြီးတော့ သူက မှားပါတယ်လို့ ၀န်မခံခဲ့ဘူးလေ)

+++++

နောက်နေ့မှာတော့ ရှင် ကျမဆီ လာခဲ့တယ်။ (တစ်အိမ်တည်း အတူနေပေမဲ့ မျက်နှာချင်းမဆိုင်ဖြစ်ကြဘူး မဟုတ်လား)ကျမကို တည့်တည့်ကြည့်ပြီး

“ခင်ဗျား ဖြူလဲ့ကို ဘာတွေပြောသလဲ”

“ဟင့်အင်း၊ ကျမပြောတဲ့အထဲမှာ မိုက်မိုက်ရိုင်းရိုင်း မပါဘူး၊ ပြီးတော့ သူက အများဆုံး ပြောတာ၊ စကားဝိုင်းကလည်း အေးအေးဆေးဆေးပဲ ပြီးသွားတာပါ”

ရှင်က ကျမကို စိုက်ကြည့်မြဲ ကြည့်နေခဲ့တယ်။ ပြီးတော့မှ “အင်း… ခင်ဗျား လိမ်တော့ မလိမ်တတ်ပါဘူးလေ”လို့ ရေရွတ်တယ်။ ရှင်မှတ်မိတယ် မဟုတ်လား။ ပြီးတော့ ရှင်ထွက်သွားတယ်။ နောက်မှ ကျမသိရတယ်။ အဲဒီနေ့မှာ ဖြူလဲ့က ရှင့်ကို ကျမကို နားလည်အောင် ကြိုးစားပါ… ပြီးတော့ သူ့ကို မေ့ပစ်လိုက်ပါတော့လို့ ပြောလိုက်တယ် တဲ့။

အဲဒီနောက်ပိုင်း ရှင်အိမ်ပြန်မလာတော့ဘဲ နေပြန်တယ်။ ကျမရင်ထဲမှာ အဲဒီ ကာလတွေတုန်းက စိတ်လှုပ်ရှား နေခဲ့တယ်။ ရှင်ပြန်လာခဲ့ရင် ကျမ ကွာရှင်းခွင့်ပေးလိုက်ရ ကောင်းမလား။ ဒါမှမဟုတ် ကျမဘက်ကို ပါအောင် ပြန်ခေါ်ယူရကောင်းမလား ဆိုတာမျိုးတွေ တွေးနေတယ်။ အတွေ့ဇာတ်ကားထဲက သီသီကို သတိရနေတတ် တယ်။ ကျမ စိတ်တွေ ငြိမ်ဝပ်နေသလိုလည်း ဖြစ်နေခဲ့တယ်။ ရှင် ကျမကို သဘောကျခဲ့တာပဲလေ လို့လည်း ကိုယ့်ဘာသာ အားပေးသလို တွေးနေမိပြန်တယ်။ အိမ်ထောင်ဦးဘ၀တုန်းက ရှင်နဲ့ ကျမ ဆက်ဆံရေး နွေးထွေးခဲ့ဖူးတာကို သတိရတယ်။ ရုတ်တရက် ကျမ တစ်ခု သွားတွေးမိတယ်။ နွေထွေးခဲ့ပေမဲ့ ပျော့ပျော့ ပျောင်းပျောင်းမှ ရှိခဲ့ရဲ့လားလို့။ ဖြူလဲ့ကို သတိရတယ်။ သူကလည်း ကျမကို ပညာပေးသွားခဲ့တာပဲ။ “ထမင်းလက်ဆုံစားရုံ၊ ၀ါသနာပါရာ ဆွေးနွေးကြရုံနဲ့ အိမ်ထောင်သည်ဘ၀ ပြည့်စုံသွားတာမှ မဟုတ်ဘဲ မမ၊ ကိုကိုက ယုယတာ ကြိုက်တယ်၊ ယောက်ျားတိုင်း၊ ပြီးတော့ လူတိုင်းပါပဲ မမရယ်”တဲ့။ ဖြူလဲ့က လာ လာ ပြောနေသလိုပဲ။ ဟုတ်မှာပေါ့၊ ကဗျာအယူအဆတွေ နှစ်ယောက်ပြောကြရင်း တစ်ကြိမ်မှာ နှစ်ယောက် အယူအဆ တူသွားဖူးတုန်းက ကျမ ရှင့်ကိုလွှတ်ကနဲ နမ်းမိသွားတယ်။ ပြီးတော့ ရှက်တက်တက်နဲ့ “ဒါလင်က သိပ်တော်တာပဲကွယ်၊ အဲဒါတွေကို ထရီဇာသဘောကျခဲ့တာ သိလား”လို့ ပြောဖြစ်ခဲ့တာလေ၊ ရှင်မှတ်မိလား။ မှတ်မိမှာပါ။ အဲဒီတုန်းက ရှင်တောင် ကျမကို စူးစူးစိုက်စိုက်ကြည့်ရင်းနဲ့ “ကိုယ်ထရီဇာ့ကို ချစ်ပါတယ်ကွာ” လို့ ပြန်ပြောခဲ့တာလေ။ ရှင့်အသံတွေ တုန်ယင်လို့။ ကျမတောင် ရင်ထဲ နွေးထွေးသွားခဲ့ သေးတယ်။

သေချာတာကတော့ ကိုအောင်ရဲရယ်၊ သိက္ခာကြောင့်ပဲဖြစ်ဖြစ်၊ ဘ၀ကို မစွန့်ရဲလို့ပဲဖြစ်ဖြစ် ရှင်နဲ့ ကျမရဲ့ အိမ်ထောင်ရေးဘ၀ကိုတော့ မပြိုပျက်စေချင်တာ အမှန်ပါပဲ။ ကျမ ရှင့်ကို မျှော်စောင့်နေခဲ့တယ်။ မျှော်နေခဲ့တဲ့ နေ့ကလည်း ရောက်လာခဲ့တာပါပဲ။

+++++

ကျမ စာဖတ်နေတုန်း ကားရပ်သံကြားလိုက်တယ်။ ရှင့်ကားရပ်သံမှန်း ကျမ မှတ်မိလိုက်တယ်။ ကျမ ပြင်ဆင် နေမိတယ်။ “ထရီဇာတို့ အေးအေးဆေးဆေး ဆွေးနွေးကြရအောင်လား ကိုအောင်” လို့ စကားစရင် ကောင်းမယ်လို့ တွေးတယ်။ အဲသည်တုန်း ရှင်အခန်းထဲ ၀င်လာတယ်။ ရှင့်မျက်နှာက တင်းမာမနေဘူး။ နောက်ပြီး ဒေါသရိပ်လည်း မတွေ့ရဘူး။ ကျမစိတ် နည်းနည်းပေါ့သွားတယ်။ အဲဒီအချိန်လေးမှာပဲ ရှင် စကားစ တယ်။

“ဖြူလဲ့နဲ့ ကိုယ် ဘယ်လိုမှ ရှေ့ဆက်လို့ မရတော့ဘူး။ ဖြူလဲ့ ကိုယ့်ကို ငြင်းတယ်၊ ခင်ဗျား သဘောကျတယ် မဟုတ်လား”

ကျမ ခါးခါးသီးသီး ခေါင်းကို သွက်သွက်ခါနေမိတယ်။

“မဟုတ်ဘူး ကိုအောင်၊ မဟုတ်ဘူး ထရီဇာပြောမယ်”

လေသံကို ပျော့ပျောင်းအောင် ဂရုစိုက်ပြီး ကျမ စကားစလိုက်တယ်။

“တော်ပါ ထရီဇာ၊ ကျနော်စိတ်မ၀င်စားပါဘူး”

အင်မတန်ရိသဲ့သဲ့ နိုင်တဲ့အသံပါပဲ။ ကျမ စိတ်တိုသလိုဖြစ်သွားတယ်။ ဒါပေမဲ့ ကျမ ထိန်းတယ်။ နာကျင်တဲ့ရင်က ခုန်နေတယ်၊ မာနက ပြန်ပြီး ခေါင်းထောင်လာတယ်။

“ဖြူလဲ့ကို ပြန်ခေါ်ပါ၊ ကျမ ရှင့်ကို ကွာပေးမယ်”

ရင်ထဲမှာ သေသေချာချာကြီးကို လှိုက်ခုန်နေတယ်။ ရှင်က အော်ရယ်တယ်။ ဟားတိုက်ပြီးတော့ ရယ်တယ်။ ပြီးတော့…

“ဖြူလဲ့က ကလေးပေါက်စန မဟုတ်သလို ခင်ဗျားလိုပဲ မာနရှိတယ် မထရီဇာရဲ့ သိလား၊ အမှတ်သညာလည်း ကြီးတယ်”

ပြီးတော့ ဆက်ပြောပြန်တယ်။

“ဒါက ကျုပ်တို့အပိုင်းပါ၊ ခုလိုအပ်တာက ခင်ဗျား ကွာရှင်းလက်မှတ်ထိုးပေးမယ့်နေ့ကို ကျုပ် စောင့်နေတယ် ဆိုတာပဲ”

ကိုအောင်ရဲရယ်၊ ကျမ ဘယ်ဘက်ရင်အုံရဲ့ ဟိုးအထက် နက်နက်တစ်နေရာမှာ စူးကနဲ အောင့်သွားတယ်။ ခန္ဓာကိုယ်တောင် ယိုင်လဲတော့မလို ဖြစ်သွားတယ်၊ ရှင့်မျက်နှာ အေးစက်စက်က ကျမကို ခြောက်လှန့်လာ တယ်။

“စောင့်စရာမလိုပါဘူး၊ ခု ကွာဆိုလည်း ရပါတယ်”

လို့ ကျမ ပြန်ပြောတော့ ရှင့်မျက်လုံးတွေ တစ်မျိုး အရောင်တောက်လာတယ်။ ကျမ နားမလည်နိုင်တဲ့ အရောင်တွေပါပဲ။ ပြီးတော့ ကျမကို စိုက်ကြည့်ပြီး…

“ဖြူလဲ့နဲ့ ကျုပ်ပြတ်စဲကြရင် ကျုပ်ခင်ဗျားဘက် ပြန်ရောက်လာလိမ့်မယ်လို့ ခင်ဗျား ယူဆရင် မှားတာပဲ မထရီဇာ၊ ခင်ဗျားဘယ်နေရာမှာ ဘယ်လောက်တော်တော် ကျုပ်ကိုတော့ ခင်ဗျားတွက်ကိန်းချလို့ မရဘူးဆိုတာ ခင်ဗျား ခုလောက်ဆို သိလောက်ရောပေါ့၊ ခင်ဗျားကို ဦးစားပေးလက်စနဲ့ ဆက်ပြီး တစ်ခု ဦးစားပေးမယ်၊ ခင်ဗျား စဉ်းစားပါဦး၊ ပြီးလို့ ဆုံးဖြတ်နိုင်ပြီဆိုတာနဲ့ ကျုပ်ကို ခေါ်လိုက်ပါ၊ ကွာရှင်းစာချုပ်နဲ့ အတူ ကျုပ်လာခဲ့ မယ်”

စကားလည်းအဆုံး လှည့်လည်း အထွက်ပါပဲ၊ ကျမထင်တယ်။ ကျမဟာ ရုပ်ဝတ္ထု အနေနဲ့တောင် ရှိသေးရဲ့လားလို့။ အသွေးအသားတွေ တစစီ ပေါက်ကွဲကုန်သလိုပါပဲ။ ဘယ်သူ အထင်သေးတာကိုမှ မခံခဲ့ရဖူး သေးတဲ့ ကျမ၊ ခံမယ့်ခံရတော့ ကိုယ်တိုင်ရွေးချယ် ကြည်ဖြူခဲ့တဲ့ ယောက်ျားရဲ့ အထင်သေးတာကိုမှ ခံရတယ်လို့ ကျမ နာနာကျင်ကျင် တွေးတယ်။ ရှင် ခဏခဏပြောဖူးတဲ့ “မင်းက လူသာသေမယ်၊ မာနကျန်မယ့် မိန်းမပဲ” ဆိုတာကို ဖျတ်ကနဲ သတိအရမှာ ကားထဲရောက်သွားပြီဖြစ်တဲ့ ရှင့်ကို အော်ပြောဖြစ် လိုက်တယ်။

“ကိုအောင်ရဲ… စာချုပ်ဝယ်ခဲ့ပါ၊ ကျမတို့ ဒီကနေ့ပဲ ကွာရှင်းလိုက်တာပေါ့”

ရှင်တစ်ချက်ပြုံးတယ်။ သတိထားလိုက်မိရဲ့လား၊ ကျမကတော့ သတိထားလိုက်မိတယ်။ ရှင့်အပြုံးက မဲ့နေတာကိုး။

+++++

ကိုယ့်ကိုယ်ကို သပ်သပ်ရပ်ရပ်ဖြစ်အောင် ပြုပြင်ပြီး ကျမ ရှင့်ကို စောင့်နေခဲ့တယ်။ ဘာကိုမှ မတွေးမိအောင် သိုးမွေးထိုးရင်း စိတ်လှုပ်ရှားမှုကို ထိန်းနေခဲ့တယ်။ ကားရပ်သံကြားတယ်၊ ရှင်ဝင်လာတယ်၊ ကျမရဲ့ ရှေ့မှာ ထိုင်တယ်။ ကျမကို စိုက်ကြည့်နေတယ်ဆိုတာ ကျမ သိနေတယ်။ ကျမ မျက်လွှာလှန်ကြည့်လိုက်တယ်၊ ရှင့်နှုတ်ခမ်းတွေ လှုပ်သွားတယ်။

“တကယ် ဆုံးဖြတ်လိုက်ပြီလား ထရီဇာ”

ကျမ အံကြိတ်လိုက်တယ်။ ပြီး ခေါင်းညိတ်လိုက်တယ်။ ရှင်က စိုက်ကြည့်နေပြန်တယ်။ ကျမ မတ်တတ်ရပ် တယ်။ လှည့်ထွက်တယ်။ ကျမကားပေါ်အရောက်မှာ ရှင့်ကားဆီ လှမ်းကြည့်ဖြစ်တယ်။ ရှင့်မျက်နှာက ဖြူလျော် နေတယ်။ ကျမ ပြုံးမိတယ်။ ခုတော့လည်း တုန်လှုပ်နေပြန်ပြီလား ကိုအောင်ရဲရယ်လို့ တွေးပြီး ကားမောင်း ထွက်ဖြစ်ခဲ့တယ်။ ဒီတစ်ခါတော့ နှစ်ဖက်မိဘမပါ၊ သူငယ်ချင်းသက်သေမပါဘဲ ရှင်နဲ့ ကျမ နှစ်ဦးတည်း လက်မှတ်ထိုးရမှာပေါ့။

စားပွဲပေါ်ကို စာချုပ်တစ်စုံ ရောက်လာတယ်။ တရားသူကြီးရဲ့ မျက်လုံးတွေက မှုန်မှိုင်းနေသလိုပဲ။ ကျမ ဘောပင် ကိုင်တယ်။ လက်တွေတုန်နေတာ ပတ်ဝန်းကျင် (အထူးသဖြင့် ရှင်)သတိထားမိသွားမှာ စိုးနေမိတယ်။ ရှင် တစ်စုံ ကောက်ယူတယ်။ လက်မှတ်ထိုးအပြီးမှာ ကျမကို လှမ်းပေးတယ်။ ရှင့်လက်ဖျားတွေကလည်း တုန်ယင် နေသလိုပဲ၊ ကျမ နည်းနည်း ကျေနပ်သွားတယ်။

+++++

ကားသော့ကို ဖြုတ်ပြီး အိမ်ထဲလှမ်းအ၀င်မှာ ရှင် ကျမလက်မောင်းကို လှမ်းကိုင်တယ်။ ကျမ ရှင့်ကို မော့ကြည့်မိတယ်။ ကျမမျက်လုံးတွေကတော့ မာနကြောင့် တောက်ပြောင် နေဦးမှာပါပဲ။ ရှင်ကပြောလာတယ်။

“မင်းဟာ သိပ်ကို ခေါင်းမာတာပဲနော်၊ ထရီဇာရယ် ယောက်ျားက ပစ်ချင်လောက်အောင် ဘာဖြစ်လို့ မာနကြီးချင်ရတာလဲ၊ ကိုယ်မင်းကို တကယ်ချစ်ခဲ့တာပါ”

ကျမ ရင်တစ်ချက် ခုန်သွားတယ်။ ရင်ခုန်သံကို ကျမ ထိန်းချင်တယ်။ ထရီဇာပဲ အလျှော့မပေးရပါဘူးလို့ တွေးပြီး ခံစားချက်ကို ပြောင်းယူတယ်။ ရှင်ပဲ ကျမကို မုန်းတယ်ဆိုတဲ့ စကားမျိုးတွေပြောခဲ့ပြီး ဘယ်လောက်မှ မကြာ ဘူး… ချစ်တယ်လို့ ပြောပြန်တယ်လို့ ကျမ တွေးယူတယ်။ အဲဒီအခါ ရယ်ပစ်ချင်လာဖို့ သတိရတယ်။ ရယ်စရာ ကောင်းတယ်လို့မှ မတွေးနိုင်ရင်လည်း ရှင့်ရဲ့အလှည့်အပတ်ထဲမှာ ကျမ ကျွံဝင် သွားမှာ ကြောက်တယ်။

ရှင်က ကျမ ပခုံးကို ကိုင်ပြန်တယ်။ ပြီး တစ်ချက် ဖျစ်တယ်။ နောက် လှည့်ထွက်တယ်။ ကျမကို တစ်ချက် ပြန်လှည့်ကြည့်တယ်။ ကျမ သွေးခုန်နှုန်းတွေ မြန်လာတယ်။ လည်ချောင်းထဲမှာ တစုံတခု လာဆို့တယ်။ လက်တွေထဲမှာ အားယုတ်သွားတယ်။ တံခါးနံရံကို လက်နဲ့ အားပြုပြီး ပြုံးပြနိုင်အောင် ကြိုးစားတယ်။ ကျမ ပြုံးပြတာကို တွေ့မှ ရှင် တကယ် ကျောခိုင်းသွားတော့တယ်။

ကျမမျက်လုံးတွေ ၀ါးလာသလိုပဲ။ လက်ထဲက ကွာရှင်းစာချုပ်က လေမတိုက်ပါဘဲ တဖျတ်ဖျတ် တုန်နေတယ်။ ခုတင်ဘေး စားပွဲပေါ်ကို စာချုပ် လှမ်းတင်လိုက်တယ်။ နှစ်ယောက်အိပ် ကုတင်ဆီ မျက်လုံးအရောက်မှာ ပါးပြင် နွေးကနဲ ဖြစ်သွားတယ်။ အမလေး… ကျမ မျက်ရည်ကျတယ်။ မငိုရဘူး… မငိုရဘူး၊ ထရီဇာဟာ ကိုယ်မမှားတဲ့ အဖြစ်အပျက်တစ်ခုအတွက် ဘယ်တော့မှ မျက်ရည်မကျရဘူး။ မျက်ခွံတွေကို လက်ဖ၀ါးနဲ့ ပွတ်သုတ်ပစ် လိုက်တယ်။ ခေါင်းကို ဆတ်ကနဲ့ မော့ပစ်တယ်။ မျက်တောင်တွေကို ခဏခဏ ခတ်ပြီး စိတ်ကို တင်းတယ်။ “ရှင်တို့ ယောက်ျားတွေဟာ သိပ်ကိုရယ်ရတာပဲ”လို့ တတွတ်တွတ်ရွတ်ရင်း မျက်ရည်ကို ထိန်းတယ်။ ခဏကြာ တော့ ဆောက်တည်ရာရပြီလို့ ယူဆတယ်။ အားပါးတရ အော်ရယ်နိုင်ရင် သိပ်ကောင်းမှာပဲလို့တွေးပြီး ရယ်ဖို့ ကြိုးစားတယ်။ မရဘူး။ ပြုံးကြည့်တယ်၊ ခါတိုင်းပြုံးနေကျ ထရီဇာရဲ့ နာမည်ကျော် ယုံကြည်ပြုံးလေ။ ကိုယ့်ကိုယ်ကို ယုံကြည်မှုရှိလွန်းတဲ့ အပြုံးပေါ့။ ပြုံးပြီး စာချုပ်ကို ထပ်ကြည့်မိတယ်။ ‘အောင်ရဲ’တဲ့။ တဘက်မှာ ‘အေးအေးဦး’ ဘယ်ဘက်ရင်အုံထဲမှာ စူးကနဲ အောင့်တယ်။ မျက်လုံးအကြည့်မှာ… အေးအေးဦး… ဆိုတဲ့ စာလုံးတွေက မှုန်ဝါးသွား တယ်။

မေငြိမ်း
ဇူလိုင်လ၊ ၁၉၈၉-ခုနှစ်
မဂ္ဂဇင်းဝတ္ထုရှည် စ-ဆုံး
ရွှေအမြုတေ အတွဲ-၁၊ အမှတ်(၁)

အမျိုးသမီး ဆိုတာ..

နိုဝင်ဘာလ ၂၅ရက်နေ့ဟာ ‘အမျိုးသမီးများကို အကြမ်းဖက်မှုပပျောက်ရေး နိုင်ငံတကာ အထိမ်းအမှတ်နေ့’ (International Day for Elimination of Violence against Women) ပါ။ ပြီးတော့ (၂၈၊၁၁၊၀၇-ဗုဒ္ဓဟူးနေ့)ရဲ့ ဘီဘီစီ ရေဒီယို မြန်မာပိုင်း အစီအစဉ်က ‘ကမ္ဘာ့အရေး မြန်မာ့အရေး’ ဆွေးနွေးခန်းကလည်း မြန်မာ့နိုင်ငံရေး လှုပ်ရှားမှုထဲက အမျိုးသမီးတွေ ရဲ့ အခန်းကဏ္ဍဖြစ်ပါတယ်။ အဲဒီ ဆွေးနွေးကြတဲ့အထဲမှာ ကျမ ၀င် ဆွေးနွေးခဲ့ရ ပါတယ်။ ဒီနေရာမှာ တခြား ၀င်ရောက်ဆွေးနွေးကြတဲ့ အမျိုးသား အမျိုးသမီးတွေရဲ့ ဆွေးနွေးချက်တွေက ပြည့်စုံလွန်းလို့ တကယ်တမ်း ကျမ ပြောချင်တာတွေ အများကြီး ပါသွားတာနဲ့ ကြုံရပါတယ်။

နောက်တချက်ကတော့ တကယ့် ခေါင်းစဉ်ကြီးတခုကို အချိန်တို မိနစ်ပိုင်းကလေး အတွင်း ပြောရတာကြောင့် အပြည့်အစုံ မပြောနိုင်တဲ့၊ သိုင်းဝိုင်း ပြောပြခွင့်မရတဲ့အတွက် ပြောစရာတွေ ကျန် သွားတာပါပဲ။ ဒါပေမဲ့ အဖြေတခုတော့ ထွက်ပါတယ်။ အဲဒါကတော့ နိုင်ငံ့အရေးမှာ အမျိုးသမီးတွေရဲ့ ပါဝင်မှု အခန်းကဏ္ဍက အရေးပါတယ်ဆိုတာ ကို လူ့ပတ်ဝန်းကျင်က အများကြီး သတိပြု လာကြ ရပြီ ဆိုတာပါပဲ။

ဒီနေရာမှာ အမျိုးသမီးတွေရဲ့ ကိစ္စကို တကူးတက ထည့်ပြောလာရတာ ကလည်း အကြောင်းရင်းတွေ ရှိနေတာ တွေ့ရပါတယ်။ ဒါကတော့ ကမ္ဘာပေါ်မှာ အမျိုးသားနဲ့ အမျိုးသမီး နှစ်မျိုးနှစ်စားတည်း ရှိတာတောင်မှ အမျိုးသားတွေက အမျိုးသမီးတွေကို ဦးဆောင်သူအနေနဲ့ လက်သင့်မခံချင် လို့၊ နိုင့်ထက်စီးနင်းလုပ်တဲ့ အဖြစ်မျိုးတွေ ရှိလာလို့၊ အမျိုးသမီးတွေဘက်က အခွင့်အရေးတွေ တောင်းဆိုလာကြရတယ်လို့ ပြောလို့ရပါတယ်။

ဒီနေရာမှာလည်း အခွင့်အရေး(Opportunity) နဲ့ အခွင့်အလမ်း(Chance) ဆိုတာ ရှိလာပါတယ်။ အမျိုးသမီးတွေအတွက် ပိတ်ဆို့ခံခဲ့ရတဲ့ အခွင့်အလမ်း တွေ ပွင့်ဖို့ လိုပါတယ်။ ပြီးတော့ နောက်တဆင့် အခွင့်အရေးတွေ အပြည့်အ၀ရလာဖို့.. ယူနိုင်ကြဖို့ လိုပါတယ်။

မြန်မာနိုင်ငံမှာက ဓလေ့ထုံးစံ အစဉ်အလာ အစွဲအလန်းတွေအရ ‘သားကို သခင် လင်ကို ဘုရား’၊ ‘ကြက်မ-တွန်လို့ မိုးမလင်း’၊ ‘မိန်းမ-ဖျက် ပြည်ပျက်’၊ ‘မ-ဘက်လိုက်တော့ မိုက်ဘက်ပါ’ ဆိုတဲ့ အကြောင်းပြချက် ခိုင်ခိုင်လုံလုံ မရှိတဲ့ အဓိပ္ပါယ်မဲ့ အယူအဆမျိုးတွေနဲ့ အမျိုးသမီးတွေရဲ့ အခန်းကဏ္ဍကို လျှော့ချ နှိမ့်တွက် ခံထားရတာတွေ ရှိနေခဲ့ပါတယ်။ အထူးသဖြင့် ပညာရေးမှာ မိန်းကလေးမို့ စာတတ်စရာ မလိုဘူးဆိုတဲ့ အယူအဆ မျိုးတွေတောင် ရှိခဲ့တာပါ။ အမျိုးသမီးဆိုတာ လင်ကောင်းသားကောင်း ရရမယ်၊ အိမ်မှုကိစ္စ နိုင်နင်းရင်လုံလောက်ပြီ ဆိုတာတွေကိုသာ ရည်ရွယ်ချက်တွေလို စွဲလန်းခဲ့ကြ တာပါ။

ဒါပေမဲ့ ကျမတို့အမျိုးသမီးတွေကတော့ ကိုလိုနီခေတ်မှာကတည်းက ပညာရေး၊ လူမှုရေးကနေ စလို့ နိုင်ငံရေးလှုပ်ရှားမှုတွေအထိ ရှေ့ထွက်လုပ်ဆောင်လာခဲ့ကြရာက အမျိုးသမီး တွေရဲ့ အစွမ်းကို ပတ်ဝန်းကျင်က အတော်အတန် လက်သင့်ခံလာကြရပါပြီ။ ဒါပေမဲ့ အပြည့်အ၀တော့ မဟုတ်သေးပါဘူး။ ကျမတို့ အမျိုးသမီးတွေကိုယ်တိုင် ကိုင်ဆွဲမိနေတဲ့ ဓလေ့ထုံးစံလောင်းရိပ်တွေတော့ ရှိနေတုန်းပါ။ စနစ်တကျ ပြုစုရေးရင် အခိုင်အလုံ ရေးစရာတွေ အများကြီးပါ။ ဒါပေမဲ့ အဲဒီလောင်းရိပ်တွေထဲက လွတ်အောင် ရုန်းထွက် ချင်တယ်ဆိုရင်တော့ ရုန်းထွက်နိုင်လောက်တဲ့ခွန်အားမျိုး၊ အစွမ်းသတ္တိမျိုးတွေ၊ ပိုင်နိုင် ခိုင်မာတဲ့ အရည်အသွေးတွေ အရည်အချင်းတွေ ရှိဖို့လိုတာလည်း အမှန်ပါပဲ။

ခုဆိုရင် မြန်မာနိုင်ငံရဲ့ လတ်တလောဖြစ်ခဲ့တဲ့ စက်တင်ဘာ ရွှေဝါရောင် တော်လှန်ရေးထဲမှာ ဦးဆောင် ပါဝင်လာတဲ့ အမျိုးသမီးတွေ အများကြီးပါပဲ။ နောက် မြန်မာပြည်တွင်းမှာ ဒေါ်အောင်ဆန်းစုကြည်နဲ့အတူ မစုစုနွေး၊ မမီးမီး၊ မနီလာသိန်း၊ မဖြူုဖြူသင်းတို့ အပါအ၀င် အမျိုးသမီးတွေဟာ တကယ် အလုပ်လုပ်ရင်း အသိအမှတ်ပြုခံလာရတာ၊ နေရာရလာနိုင်ကြတာ၊ နေရာယူပြီး အရည်အချင်း ပြလာနိုင်တာတွေဟာ အမျိုးသမီးတွေရဲ့ နိုင်ငံ့အရေးထဲက ထင်ရှားတဲ့ အခန်းကဏ္ဍ ပြယုဂ်ပါပဲ။

တချိန်တည်းမှာပဲ အမျိုးသားတွေရဲ့ အနှိပ်စက်နဲ့ အနိုင်ကျင့်မှုကို ခံနေရတယ်ဆိုတဲ့ အမျိုးသမီးတွေလည်း ရှိနေပါတယ်။ ဒါကလည်း နှစ်ဦးနှစ်ဘက် နားလည်အောင် ပြေလည်အောင် ညှိနှိုင်းဖို့က လွဲလို့ တခြားအဖြေ ကျမတော့ ရှာမတွေ့သေးပါ။ ညှိလို့မှ မရရင်…. ဆိုတော့လည်း… အဲဒီအဖြေကို ရှာရမယ့်သူတွေဟာ ကာယကံ ရှင်တွေသာ ဖြစ်ပါတယ်။ ကိုယ့်ရဲ့ ကိုယ်ပိုင်တန်ဖိုးတွေ၊ ဂုဏ်သိက္ခာတွေနဲ့ ခံနိုင်ရည်အပေါ်မှာ တည်ပြီး အဖြေ ထုတ်ရမှာသာ ဖြစ်ပါတယ်။

တကယ်တော့ အမျိုးသမီးတွေရဲ့ အရည်အသွေးတွေ မြင့်မားဖို့၊ မြင့်မားခွင့်ရဖို့ဆိုတာ အမျိုးသမီးတွေ ကိုယ်တိုင်က ကြိုးစားယူကြရမှာဖြစ်ပါတယ်။ ပြီးတော့ ယှဉ်တွဲနေထိုင်ဘက် အမျိုးသားများဘက်ကလည်း အမျိုးသမီးတွေရဲ့ တန်ဖိုးကို အသိအမှတ်ပြု လေးစား တန်ဖိုးထားဖို့ လိုပါတယ်။ ဒီလို အပြန်အလှန် လေးစားမှုရှိမှပဲ သက်ဆိုင်ရာ အခွင့်အလမ်းတွေကို အပြန်အလှန် တွဲဖက် အသုံးချခွင့်ရပြီး အခွင့်အရေးတွေ ရလာမှာဖြစ်ပါတယ်။

အမျိုးသားနဲ့ အမျိုးသမီးဆိုတာဟာ လူ့ဘောင်လောကကို သာယာပြည့်စုံအောင် အတူ ယှဉ်တွဲဖန်တီးရမယ့် လုပ်ဖော်ကိုင်ဖက်တွေဖြစ်ပါတယ်။ ယှဉ်ပြိုင်အနိုင်ယူရမယ့် ပြိုင်ဖက်တွေ မဟုတ်ကြပါဘူး။ ဒါကို အမျိုးသားတွေ က ကောင်းကောင်း အသိအမှတ် ပြုတတ်ကြဖို့ လိုပါတယ်။ အမျိုးသမီးတွေကလည်း ကိုယ့်အရည်အချင်းကို ယုံကြည်ပြီး ဦးဆောင် ဆုံးဖြတ်ရမယ့် နေရာတွေ ယူတတ်ဖို့၊ ယူရဲဖို့၊ ယူနိုင်အောင် ဖန်တီးဖို့ လိုပါတယ်။ ဒါမှပဲ အမျိုးသမီးအချင်းချင်းအတွက် အရေးကိစ္စတွေကို သေသေချာချာ ပါဝင်ကိုင်တွယ် ဖြေရှင်း ဖြည့်ဆည်း ပေးနိုင်မှာ ဖြစ်ပါတယ်။ အရေးကြီးတာက ဦးတည်ချက်အားလုံးဟာ အမျိုးသားအမျိုးသမီး တန်းတူ လက်တွဲ လုပ်ဆောင်ခြင်းနဲ့ ကိုယ့်လောက၀န်းကျင်ကို အလှဆင်ဖို့ပါပဲ။

ဒီနေရာမှာ ပြည်တွင်းက ဆရာမကြီး ဒေါက်တာဒေါ်မြင့်မြင့်ခင်က ဘီဘီစီရေဒီယိုမှာ ပြောခဲ့တဲ့ စကားလေးကို လက်ဆင့်ကမ်းချင်ပါတယ်။

“အမျိုးသမီးတွေက အရည်အချင်းရှိပြီးသားပါ။ လမ်းတွေဖွင့်ပေးလိုက်ဖို့ပဲ လိုပါတယ်”

မေငြိမ်း
၂၉၊၁၁၊၀၇။

မွေးနေ့ ပူဇော်စာ

(ဒီနေရာက ယူလာတာပါ)

ဒီကနေ့ (၂၉၊၁၁၊၀၇) မှာ အသက် ၉၂နှစ်ပြည့်သွားတဲ့အထိ၊ ဘ၀တလျှောက်လုံး နိုင်ငံနဲ့ ပြည်သူလူထုအပေါ်.. စာအုပ်စာပေအပေါ်.. တဆံခြည်စာမျှ သစ္စာမယွင်းဖူးခဲ့တဲ့၊ အမှန်တရားအတွက် အလွန် တာဝန်ကျေခဲ့တဲ့၊ စိတ်ဓါတ်ခိုင်ကျည်လှတဲ့၊ မေတ္တာ ကရုဏာရှင် သတင်းစာဆရာ စာရေးဆရာမကြီး အမေ လူထုဒေါ်အမာ.. အသက်ရာကျော် ရှည်တဲ့အထိ ကျန်းမာ ပျော်ရွှင်စွာနဲ့ စာတွေအများကြီး ရေးနေနိုင်ပါစေ..။ အမေမာဟာ… ဆရာဂျမ်း(ကဗျာဆရာတင်မိုး)ရဲ့ "အမေသို့" ဆိုတဲ့ ကဗျာထဲကလို

အမေ
ထာဝရမသေ
အမတ အမတေ
ဘယ်တော့မှ မသေ….။

စာအုပ်နှစ်အုပ်

စာအုပ်ပို့ဖို့ ကိစ္စခက်ခဲတာက တကြောင်း၊ PDF နဲ့ တင်ပေးပါလို့ တောင်းဆိုတဲ့ သူတွေ များတာကြောင့် တကြောင်း၊ နောက်ဆုံးတော့ အသင်းရန်ပုံငွေက အရေးမကြီး၊ များများဖတ်ရဖို့က ပိုအရေးကြီးတာမို့ အများစုရဲ့ တောင်းဆိုမှုအတိုင်း PDF နဲ့ တင်ပေးလိုက်ပါပြီ။

ဒီကနေ ယူပါ။

-ဘလော့ဂါ လက်စွဲစာအုပ်

-မြန်မာစာနှင့် စကားသံများ

လွိုင်ကထုံ

(အဲလိုမီးရောင်တွေက တမြို့လုံးပါ။ မြန်မာပြည်ကရတဲ့ ဂက်စ်တွေနဲ့ ထိန်ထိန်လင်းနေတဲ့ သူတို့တိုင်းပြည်)

ဘာလိုလိုနဲ့ … ဇင်းမယ်မှာ လွိုင်ကထုံပွဲနဲ့ ကြုံရတာ ဒီနှစ်ပါနဲ့ဆိုရင် ၃နှစ်တောင် ရှိပြီပဲ။

ကြုံရတိုင်းလည်း ကိုယ့်ဗမာပြည်ကို သတိရပြီး ပြေးပြန်ချင်လာတာချည်းပါပဲ။ ဒါပေမဲ့.. ပျော်ရာမှာ မနေရ၊ တော်ရာမှာ နေရမယ်တဲ့။ ဆရာဂျမ်း(ကဗျာဆရာတင်မိုး)ရေးတဲ့ “တို့တိုင်းပြည်” ကဗျာထဲကလို...

"နေချင်ပါလည်း
မနေရဲပြီ
စစ်သရဲတွေ
စီးနေ၍"

… … ဆိုသလိုပါပဲ။

ဇင်းမယ်မှာ ဗမာပြည်ကို အလွမ်းရဆုံးအချိန် နှစ်ချိန်ရှိပါတယ်။ လွိုင်ကထုံမီးထွန်းပွဲနဲ့ သင်္ကြန်ပွဲကာလတွေမှာပါ။ အဲဒီအချိန်တွေမှာ ဇင်းမယ်က ကိုယ့်တိုင်းပြည်နဲ့ အတူဆုံးလေ။ ခုလို လွိုင်ကထုံလို့ခေါ်တဲ့ တန်ဆောင်တိုင်ပွဲ မှာဆိုရင်လည်း ရာသီသဘာဝနဲ့ ခပ်ဆင်ဆင် ဓလေ့ထုံးစံတွေကြောင့် ဗမာပြည်ကို သတိရစရာကောင်းတာပါ။ ပြီးတော့ အဲဒီပွဲတော်တွေ မှာဆိုရင် ထိုင်းနိုင်ငံမှာ ဇင်းမယ်က အစည်ကားဆုံး အကျော်ကြားဆုံးဖြစ်တဲ့အတွက် တနိုင်ငံလုံးက အရောက်လာပြီး ပျော်ကြရတဲ့အပြင် နိုင်ငံခြားသားဧည့်သည်တွေ အများဆုံးလာတဲ့ မြို့လည်း ဖြစ်ပါတယ်။

ကျမကတော့ ရန်ကုန်သူဆိုတော့ မန္တလေးနဲ့ အသွင်အပြင်တူလှတဲ့ ဇင်းမယ်မှာနေပေမဲ့ ကိုယ်အကျွမ်းဝင်တဲ့ ရန်ကုန်တန်ဆောင်တိုင်ကိုပဲ လွမ်းနေမိပါတယ်။ ဒါတောင် ကျမတော်တော်ငယ်ငယ်တုန်းက ဆင်နွှဲခဲ့ရတဲ့ တန်ဆောင်တိုင်ပွဲပါ။ ရန်ကုန်မှာက သီတင်းကျွတ်ဆိုရင် ရေကျော်ရပ်ကွက်က စည်ကားပြီး၊ တန်ဆောင်တိုင် မှာတော့ တရုတ်တန်းဘက်နဲ့ ကျောက်မြောင်း၊ သင်္ကန်းကျွန်းဘက်တွေမှာ စည်ပါတယ်။ တရုတ်တန်းကတော့ ၁၀လမ်း၊ ၁၃လမ်း၊ ၁၅လမ်းတွေကနေ စပြီး လမ်း၂၀၊ လသာလမ်းထိ ပွဲဈေးတန်းတွေနဲ့ တောက်လျှောက် စည်တာပါ။

၁၃လမ်းမှာကတန်ဆောင်တိုင်ဆို နာမည်ကြီးတာက ကာတွန်းဦးဘဂျမ်းနေခဲ့တဲ့ လမ်းမို့ နှစ်တိုင်း ဦးဘဂျမ်း ရေးခဲ့တဲ့ ကာတွန်းတွေကို လမ်းအပြည့် ချိတ်ဆွဲပြတာပါ။ လူတိုးမပေါက်အောင် များတာမို့ တန်းစီပြီး ကြည့်ကြရပါတယ်။ နောက် ၁၀လမ်းထိပ်မှာက မာဃစင်လို့ခေါ်တဲ့ ဖျော်ဖြေရေးမဏ္ဍပ်ရှိပါတယ်။ အဲဒီတုန်းက (ဒေါ်)မာမာအေးတို့၊ (ဒေါ်)တင်တင်မြတို့၊ (ဒေါ်)ထား၊ စန္ဒယားချစ်ဆွေ၊ ကိုမင်းနောင်၊ ဂီတလုလင် မောင်ကိုကို တို့လို တွေ့ရခဲ၊ နားထောင်ရခဲတဲ့ နိုင်ငံတော်အဆိုတော်တွေက ဖျော်ဖြေတာမို့ လာနားထောင်တဲ့ ပရိသတ်ဟာ လူပင်လယ်ကြီးဖြစ်နေတာပါ။

ကျောက်မြောင်းနဲ့ သင်္ကန်းကျွန်းဘက်မှာကတော့ ဖျော်ဖြေရေးစင်တွေ ရှိပါတယ်။ ရပ်ကွက်အလိုက် စတိတ်ရှိုးတွေ၊ ကပွဲတွေ၊ အငြိမ့်တွေ၊ ဗလာရုပ်ရှင်ပြပွဲတွေ၊ ရုပ်သေးပွဲတွေရှိပါတယ်။ ကျမတို့ ကလေးတွေ အကြိုက်ဆုံးကတော့ ရုပ်သေပြပွဲတွေပါပဲ။ တကယ့်လူတွေက အရုပ်တွေလို ငြိမ်ပြီး မှန်ခန်းတွေထဲမှာ ရုပ်သေ သရုပ်ဆောင်ကြတာပါ။ များသောအားဖြင့် ဥမ္မာဒဏ္ဍီဇာတ်၊ ပဋာစာရီဇာတ်၊ မင်းကုသနဲ့ ပပ၀တီဇာတ်တွေထဲက နာမည်ကြီး လူသိများတဲ့ ဇာတ်ကွက်တကွက်ကိုရွေးပြီး သရုပ်ဆောင်ကြတာပါ။ သိပ် စိတ်ဝင်စားစရာ ကောင်းတာပါပဲ။ လူတွေက ပြင်ထားတာကအစ တကယ့်အရုပ်တွေလို။ ကျမတို့ အကြာကြီးစောင့်ကြည့်ပေမဲ့ နည်းနည်းမှ လှုပ်တာမတွေ့ရပါဘူး။ အခု နောက်ပိုင်း ဗမာပြည်မှာ ထွန်းကားလာတဲ့ Art Performance show ဆန်ဆန်ပါပဲ။

အဲဒီတန်ဆောင်တိုင်မှာဆို ကျမတို့နေတဲ့ ရွှေဘုံသာလမ်း (မဂိုလမ်း)ကနေ အဲဒီ တာမွေ ကျောက်မြောင်းဘက် ထိ လမ်းလျှောက်သွားတာမှာ လမ်းတလျှောက် ပွဲလမ်းဈေးသည် ပြတ်တယ်လို့ မရှိတော့၊ ကျမတို့တွေ ညောင်းဖို့တောင် မေ့နေခဲ့ကြတာပါ။ ဘာပဲဖြစ်ဖြစ် လူတွေ ပျော်ခွင့်တော့ ရခဲ့ကြဖူးပါသေးတယ်။

ဒီနှစ်မှာတော့ ကျမအတွက် ကိုယ့်နိုင်ငံကို သတိရစရာက ပိုရှိနေသလိုပါပဲ။ ကထိန်ပွဲတွေ အကန့်သတ်ခံရတာ။ ကိုယ်ကိုးကွယ်တဲ့ ဘုန်းဘုန်းတွေ ပျောက်နေတာ။ သာသနာရောင် သင်္ကန်းဝါ၀ါလေးတွေ နေရာမှာ အစိမ်းပုပ်ရောင် ယူနီဖောင်းတွေက နေရာယူထားတာ။ လက်အုပ်ချီရင်တောင် ဖမ်းတယ်ဆိုတဲ့ တိုင်းပြည်မှာ ကျမတို့ ပြည်သူလူထုတွေအတွက် ဘာသာ သာသနာ ပွဲလမ်းတွေကလည်း 'တစပြင်'လိုသာ ရှိနေမှာလေ။ ပြည်သူလူထုရော သံဃာတော်တွေပါ.. ကြိမ်မီးအုံးသလို ပူဆွေးနေကြမယ့်အချိန်။ ကျမ မပျော်နိုင်ပါ။

ဒါပေမဲ့ ကျမတို့နိုင်ငံလိုပဲ ခုချိန်မှာ စစ်အုပ်ချုပ်ရေးနဲ့ နေနေရတဲ့ ထိုင်းနိုင်ငံရဲ့ ဇင်းမယ်မြို့မှာကတော့ မီးရှူးမီးပန်းတွေ.. ဗျောက်အိုးတွေ.. တဒိုင်းဒိုင်းဖောက်တဲ့ လွိုင်ကထုံလို ပွဲတော်က စည်ကားမပျက်ပါဘဲ။ ဇင်းမယ်ရဲ့ လွိုင်ကထုံပွဲမှာ ထူးခြားတာကတော့ တမြို့လုံးမှာ အလှပြယာဉ်တွေ လှည့်တာပါပဲ။ ထိုင်းယောက်ျားလေး မိန်းကလေးတွေက ရှေးထိုင်းရိုးရာဝတ်စုံတွေနဲ့ ကားပေါ်မှာ အလှပြထိုင်ပြီး လှည့်လည် တာပါ။ ကျမတို့ဆီက နှစ်ကျိပ်ရှစ်ဆူဘုရားလှည့်သလို မီးရောင်စုံအလှဆင်ထားတဲ့ ကားတန်းတွေနဲ့ ဘုရားအပူဇော်ခံ ဒေသစာရီကြွတာမျိုးလည်း ရှိပါတယ်။ (ဒါတောင် ဇင်းမယ်က အာဏာသိမ်း ဖြုတ်ချခံထားရ တဲ့ ၀န်ကြီးချုပ်ဟောင်း 'သက်ဆင်ရှာနာဝပ်'ကို အများဆုံး ထောက်ခံခဲ့တဲ့ နယ်မို့ အာဏာပိုင်တွေ သတိထားစောင့်ကြည့်ရတဲ့ မြို့ပါ။)

(ဇင်းမယ်ရဲ့ နာမည်ကျော် ပင်းမြစ်ပေါ်က န၀ရတ်တံတား)

(အဲဒီလို အလှပြ ဖောင်မျိုးတွေနဲ့ မြစ်ထဲလှည့်ပြါတယ်)

ထိုင်းလူမျိုးတွေဟာ လွိုင်ကထုံပွဲကို ပန်းဖောင်တွေ ရေမှာမျှော၊ မီးပုံးတွေ လွှတ်တင်တာတွေနဲ့ အဓိက ဆင်နွှဲတာပါ။ မီးပုံးလွှတ်၊ ပန်းမျှောတဲ့အခါတွေ မှာလည်း သေသေချာချာ လေးလေးနက်နက် ဆုတောင်းကြတာ တွေ့ရပါ တယ်။ ကျမတို့မိသားစုလည်း သူငယ်ချင်းတွေနဲ့အတူ မီးပုံးလွှတ် ပန်းမျှောပြီး ဆုတောင်း မေတ္တာပို့ကြပါတယ်။ ဒီနှစ် တန်ဆောင်မုန်းလပြည့်မှာ ကျမတို့အတွက် ခါတိုင်းနဲ့ မတူတာကတော့ ကျမတို့ သာသနာ့သမိုင်းမှာ စစ်အစိုးရက သံဃာတော်တွေကို သွေးမြေကျစေခဲ့တဲ့ သွေးစွန်းတဲ့ ဥပုသ်နေ့၊ ၂လပြည့်တဲ့ နေ့ ဖြစ်နေလို့ပါပဲ။ ဒါကြောင့် ကျမတို့ သေသေချာချာ ဆုတောင်းခဲ့ကြပါတယ်။

တော်လှန်ရေးတလျှောက် ကျဆုံးခဲ့ရတဲ့သူတွေအတွက် မေတ္တာပို့ အမျှဝေ ရင်း၊ ကျမတို့ နိုင်ငံကြီး လွတ်လပ်ဖို့၊ ဘာသာ သာသနာတွေ လွတ်လပ်ဖို့နဲ့ တရားမျှတမှုကြီးစိုးဖို့တွေကို သစ္စာဆို ဆုတောင်းခဲ့ကြပါတယ်။

အဲဒီလို ကျမတို့ ဆုတောင်းနေချိန်မှာ….. ကျမတို့ရဲ့ တိုင်းပြည်ကြီးဆီမှာ ကတော့ ကလေးတွေခမျာလည်း တန်ဆောင်တိုင်ဆိုတဲ့ အထိမ်းအမှတ်ကို မသိနိုင်ကြတော့၊။ ပွဲလမ်းသဘင်ဆိုတာလည်း တဖြည်းဖြည်းမှိန်ဖျော့။ မီးပန်းလေးတွေတောင် လွှတ်ကြရ ပါ့မလား။ ကိုယ်တိုင်လွှတ်တင်လိုက်တဲ့ မီးပုံးပျံကြီး မိုးပေါ် လွင့်ပျံ တက်သွားတာကို မော့ကြည့်ရင်း ပီတိဖြစ်ရတဲ့ အပျော်မျိုးကိုရော ခံစားကြရပါ့မလား။ ကျမကလေးတွေကို “မေမေတို့က ဟိုးကောင်းကင်ပေါ်က စူဠာမဏိ စေတီကြီးကို မီးပုံးပျံလွှတ်ပြီး ပူဇော်တာ၊ ရေမှာ ပန်းဖောင်တွေ မျှောတာက ရေထဲကနေ ပူဇော်တာ” လို့ ပြောချိန်မှာ သားနဲ့သမီးက မျက်လုံးလေးတွေ လင်းလာပြီး “ဒါဆို သမီးတို့ ကုသိုလ်ရသွားပြီပေါ့နော်”လို့ စိတ်အေးချမ်းသာ၊ ကျေနပ်သွားသလို ပြုံးပြီး ပြောပါတယ်။ ကျမကတော့ အဲဒီအချိန်ကလေးမှာပဲ... ဗမာပြည်မှာတော့ဖြင့် ကလေးဘယ်နှယောက် အဲလို ကျေနပ်ခွင့်၊ ပြောခွင့် ရပါ့မလဲ… ဆိုတာကို စိတ်ထိထိခိုက်ခိုက်နဲ့ တွေးနေမိပါတယ်။

မေငြိမ်း
(တန်ဆောင်မုန်းလပြည့်အမှတ်တရ)

(ဓါတ်ပုံရိုက်ညံ့တာ ခွင့်လွှတ်ပါ)